Վրաստանի գործերի ժամանակավոր հավատարմատարին կանչել են Մոլդովայի ԱԳՆ

ԵՐԵՎԱՆ, 12 նոյեմբերի – Sputnik. Քիշնևում Վրաստանի գործերի ժամանակավոր հավատարմատար Դավիթ Բոչորիշվիլին Մոլդովայի արտաքին գործերի նախարարություն է կանչվել Վրաստանի վարչապետ Իրակլի Կոբախիձեի՝ Մոլդովայի նախագահական ընտրությունների անցկացումը հետաքննելու կոչի պատճառով: Տեղեկությունը հայտնում է Մոլդովայի արտաքին գործերի նախարարության մամուլի ծառայությունը:

Ընդդիմադիրները, որոնք չեն ընդունում իշխող «Վրացական երազանքի» հաղթանակը, պահանջում են, որ Վրաստանում տեղի ունեցած խորհրդարանական ընտրությունների միջազգային հետաքննություն անցկացվի: Հետաքննության անհրաժեշտության մասին են հայտնել նաև Թբիլիսիում գտնվող եվրոպական ութ երկրների խորհրդարանների արտաքին գործերի կոմիտեների նախագահները: Վրաստանի վարչապետ Իրակլի Կոբախիձեն հայտարարել է, որ եթե խոսվում է ընտրությունների անցկացման հետաքննության անհրաժեշտության մասին, ապա պետք է սկսել ոչ թե Վրաստանից, այլ Մոլդովայից:

Արտաքին գործերի նախարարությունում նշել են, որ Մոլդովայի և Վրաստանի միջև հարաբերություններում պետք է գերակշռեն համագործակցությունն ու ավանդական բարեկամությունը:

Հիշեցնենք` նոյեմբերի 3-ին Մոլդովայում տեղի ունեցավ նախագահական ընտրությունների երկրորդ փուլը: Հաղթանակի համար պայքարում էին երկրի արևմտամետ նախագահ Մայա Սանդուն և ընդդիմադիր Սոցիալիստների կուսակցության թեկնածու Ալեքսանդր Ստոյանոգլոն՝ երկրի նախկին գլխավոր դատախազը, որը հեռացվել է Սանդուի ռեժիմի կողմից: Արձանագրություններն ամբողջությամբ մշակելուց հետո պարզ դարձավ, որ Սանդուն, որին աջակցում է «Գործողություն և համերաշխություն» արևմտամետ կուսակցությունը, ստացել է քվեների 55,33%-ը, իսկ Ստոյանոգլոն՝ 44,67%-ը։ Միևնույն ժամանակ երկրի ներքին ընտրատեղամասերի արձանագրությունների մշակումից հետո ընտրությունների երկրորդ փուլում առաջատարը Ստոյանոգլոն էր՝ 51,19%-ով, Սանդուն հավաքել էր 48,81%-ը: Այդուհանդերձ, Մոլդովայի ԿԸՀ–ն հայտարարեց, որ հաղթել է Սանդուն։