ԵՐԵՎԱՆ, 27 հոկտեմբերի – Sputnik. Երգիչ և երգահան Սևակ Խանաղյանի «Արցախը» 2020 թվականից հետո Արցախի պայքարի հիմնն էր, իսկ նրա կորստից հետո ընդվզման շարժումների երգն է։
«Հիմա այն չեմ կատարում...Դժվար է։ Այն ժամանակ գիտեի, թե ինչ եմ ուզում ասել ու ասում էի։ Բոլոր մեծ համերգներին հպարտությամբ երգում էի։ Հիմա չեմ ուզում երգել։ Ոչ մի հայ չի կարող անտարբեր լինել այս թեմայի նկատմամբ...Ցավոտ է», – նշեց նա։
Խանաղյանը տարիներ շարունակ Հայաստանում պահանջված երգիչ է և համերգասրահներ է լցնում։ Թեև նրա երգերի մեծ մասը հայերեն չեն, երգիչը բարձր է գնահատում հայկական մշակույթն ու ազգային արժեքները: Նրա համար կարևոր է իր հայկական ծագումը, և նա հպարտանում է դրանով: Սևակը տիրապետում է հայերենին, ավելին՝ կատարելապես գիտի Տաշիրի բարբառը (այն վայրը, որտեղ ապրում էր մանկության տարիներին)։ Նա կատակում է, որ կարող է բարբառի իմացության ստուգում կազմակերպել յուրաքանչյուրի համար, ով կցանկանա։
«Շատ ուրախ եմ, որ ծնվել ու մինչև յոթերորդ դասարանն ապրել եմ Հայաստանում և հենց հայկական գյուղում: Դա ինձ շատ է օգնում կյանքում: Դրա շնորհիվ ես գիտեմ, որ խոսքը և գործը պետք է համընկնեն», – նշում է նա։
Ասում է` որդիներին՝ Դավիթին և Բագրատին, դաստիարակում է իր օրինակով ։ Նա փորձում է փոխանցել բոլոր այն արժեքները, որոնք ծնողները սերմանել են իր մեջ: Ավելին` մտադիր է ամառային արձակուրդներին նրանց ուղարկել հայրենի գյուղ՝ Լոռու մարզի Մեծավան։ Ուզում է` տղաները հայերեն սովորեն և վայելեն բնությունը։
Երգիչը խոստովանում է, որ որդիները դեռ չեն տիրապետում հայերենին, թեև կրտսերին պապն արդեն հայերեն բանաստեղծություններ է սովորեցրել: Ի դեպ, ինքը՝ երգիչը, տարին մեկ անգամ անպայման գալիս է գյուղ, որտեղ նրան միշտ ջերմ են դիմավորում։
«Անցյալ տարի ես եկել էի ընտանիքիս հետ։ Իմ ավագ որդին քնում էր եղբորս մահճակալին, իսկ կրտսերը՝ իմ։ Ես նայում էի նրանց, և ամբողջ մանկությունը գալիս էր աչքերիս առաջ: Դա շատ հետաքրքիր զգացում էր», –պատմում է նա։
Այս անգամ Սևակը Հայաստան է եկել հայազգի կատարող Խչոյի և ռուս ռեփեր Գուֆի համերգին մասնակցելու համար: Համերգը տեղի կունենա նոյեմբերի 16-ին Երևանի Կ. Դեմիրճյանի անվան մարզահամերգային համալիրում:
Ինչպես է Սևակ Խանաղյանը խոսում Տաշիրի բարբառով, ինչ է պատրաստում հայկական ուտեստներից, ինչպես է ծանոթացել ռեփեր Խչոյի հետ, արդյոք կշարունակի համագործակցել ռեփեր Լյոկայի հետ` դիտեք տեսանյութում: