ԵՐԵՎԱՆ, 23 հոկտեմբերի - Sputnik. Մոլդովայում եվրաինտեգրման հարցով հանրաքվեի քվեարկության արդյունքները կեղծվել են։ Նման կարծիք է հայտնել ՌԴ ԱԳՆ պաշտոնական ներկայացուցիչ Մարիա Զախարովան:
«Ակնհայտ է, որ հանրաքվեի ամփոփիչ ցուցանիշները՝ 50,46 տոկոս «կողմ» և 49,54 տոկոս «դեմ», վերջին պահին են ապահովվել, այսինքն՝ կեղծվել են»,-նշել է Զախարովան ճեպազրույցի ժամանակ:
Նրա խոսքով՝ բնակչությունը Եվրամիությանը երկրի ինտեգրմանը «վճռական ոչ» է ասել, սակայն իշխանությունները, այդ թվում՝ նախագահ Մայա Սանդուն, ամեն ինչ արել են արդյունքները թաքցնելու համար:
Ավելի վաղ անկախ փորձագետները մատնանշել էին հանրաքվեի արդյունքների «ճշգրտումը»։ Հաշվարկի հենց սկզբից եվրաինտեգրման հակառակորդների ձայներն ավելի շատ էին։ Նույնիսկ գիշերվա ժամը երկուսին՝ արձանագրությունների 93,6%-ի մշակումից հետո, եվրաինտեգրման հակառակորդների թիվը կազմում էր 52,7% (695 421 ընտրող), իսկ աջակիցների թիվը՝ 47,3% (624 537 ընտրող), սակայն վերջնական հաշվարկի արդյունքում հավասարակշռությունը կտրուկ փոխվեց՝ կողմ ձայների դինամիկան ավելի քան 3 անգամ ավելացավ, ինչը ակնհայտորեն վկայում է լցոնման մասին։ Նույնիսկ արևմտյան մամուլը գրում էր, որ «կողմ» ձայների նվազագույն առավելությունը ցույց է տալիս, որ մոլդովական հասարակությունը պատրաստ չէ գնալ Եվրոպա, իսկ որպես որոշիչ գործոն հանդես է եկել սփյուռքը, որը փաստացի «քարշ է տալիս» երկիրը դեպի եվրաինտեգրում։
Հանրաքվեին զուգահեռ կայացել են նաև նախագահական ընտրությունները։ Մոլդովայում կայացած ընտրությունների արդյունքներով գործող եվրոպամետ նախագահ Մայա Սանդուի օգտին քվեարկել է ընտրողների 42 տոկոսը, իսկ նրա հակառակորդի՝ Մոլդովայի նախկին գլխավոր դատախազ, Սոցիալիստների ռուսամետ ընդդիմադիր կուսակցությունից Ալեքսանդր Ստոյանոգլոյի օգտին՝ 26 տոկոսը: Քանի որ թեկնածուներից որևէ մեկը ձայների բացարձակ մեծամասնություն չի հավաքել, Սանդուն և Ստոյանոգլոն նախագահական աթոռի համար կպայքարեն երկրորդ փուլում, որը տեղի կունենա նոյեմբերի 3-ին: