«Պատիվ ունեմ»–ը չի մասնակցի սահմանազատման կանոնակարգի քննարկմանն ու քվեարկությանը

ԵՐԵՎԱՆ, 22 հոկտեմբերի – Sputnik. «Պատիվ ունեմ» խմբակցությունը չի մասնակցի «Հայաստանի ու Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրեջանի և Հայաստանի միջև պետական սահմանի սահմանազատման պետական հանձնաժողովի համատեղ գործունեության մասին կանոնակարգը վավերացնելու մասին» օրենքի նախագծի քննարկմանն ու քվեարկությանը։ Այդ մասին այսօր ԱԺ լիագումար նիստի ժամանակ հայտարարեց խմբակցության ղեկավար Հայկ Մամիջանյանը։

Հայտնել ենք, որ հոկտեմբերի 21–ին ԱԺ արտաքին հարաբերությունների հանձնաժողովը դրական եզրակացություն տվեց «Հայաստանի ու Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրեջանի և Հայաստանի միջև պետական սահմանի սահմանազատման պետական հանձնաժողովի համատեղ գործունեության մասին կանոնակարգը վավերացնելու մասին» օրենքի նախագծին, և այն մտել է ՀՀ ԱԺ` քննարկման ու քվեարկության։

Նա հավելեց, որ բոլոր մանրամասները ավելի ուշ կներկայացնեն հայտարարությամբ։

Իսկ երբ ՀՀ ԱԺ նախագահ Ալեն Սիմոնյանը հայտարարեց, որ սկսվում է սահմանազատման պետական հանձնաժողովների համատեղ գործունեության մասին կանոնակարգի քննարկումը, ընդդիմությունը լքեց նիստերի դահլիճը։

Հիշեցնենք` սեպտեմբերի 5-ին ՀՀ կառավարությունը հավանություն տվեց Հայաստանի և Ադրբեջանի սահմանազատման հանձնաժողովների կանոնակարգի վավերացմանը, ինչից հետո հարցը մտավ ՍԴ։

Սահմանադրական դատարանը սեպտեմբերի 26-ին որոշեց, որ կանոնակարգը համապատասխանում է ՀՀ Սահմանադրությանը։

Նշենք, որ կանոնակարգը 7 հոդված ունի, դրանք հիմնականում գործընթացին վերաբերող տեխնիկական տվյալներ են, ընդհանրական ձևակերպումներ։ Երևանն ու Բաքուն համաձայնել են սահմանազատումն իրականացնել 1991 թվականի Ալմա Աթայի հռչակագրի վրա, բայց այդ համաձայնությունը վերջնական չէ։ Կանոնակարգում նշվում է` հնարավոր է, որ խաղաղության համաձայնագրի ընդունումից հետո գործընթացն այլ սկզբունքներով ընթանա։