ԵՐԵՎԱՆ, 17 հոկտեմբերի – Sputnik. ՀՀ ազգային ժողովում օրեր առաջ «Քաղաքացիական պայմանագիր» խմբակցության պատգամավոր Հովիկ Աղազարյանի և քննչական կոմիտեի նախագահ Արգիշտի Քյարամյանի միջև տեղի ունեցած սկանդալային միջադեպը ինքնախոստովանություն էր։ Այս մասին լրագրողների հետ զրույցի ժամանակ ասաց Բագրատ սրբազանը, որն ԱԺ էր եկել` մասնակցելու «Հայաստանի Անկախության մասին հռչակագրի անժամանցելի արդիականության մասին» ԱԺ հայտարարության նախագծի լսումների։
Հոկտեմբերի 15-ին ԱԺ պաշտպանության և անվտանգության հարցերի մշտական հանձնաժողովի հրավիրած խորհրդարանական լսումների ժամանակ կրքերը թեժացան, երբ «Քաղաքացիական պայմանագիր» խմբակցության անդամ Հովիկ Աղազարյանը դիտողություն արեց ՀՀ քննչական կոմիտեի նախագահ Արգիշտի Քյարամյանին։ ՔԿ ղեկավարը պատգամավորին խնդրեց կոռուպցիայի դեմ պայքարի, հովանավորչության համատեքստում մեկնաբանել, թե ինչ ինչով է պայմանավորված, որ առնվազն երկու անգամ իրեն դիմել են Աղազարյանի տղայի հետ կապված քրեական գործով։ Այս հարցն ավելի զայրացրեց ՔՊ–ական պատգամավորին։
«Դա ընդամենը մի դրվագ էր, որն արտահայտում էր պետական կառավարման համակարգի ողջ սնանկությունը, պերճանքն ու թշվառությունը։ Մարդիկ ինքնախոստովանություն արեցին կամ հանցագործության բացահայտում: Եթե մենք նորմալ իրավական համակարգ ունենայինք, տեղում պետք է հաղորդում ներկայացվեր կամ ներկայացնեին, որևէ վարույթ սկսեին: Բացահայտ հաղորդում է տրվել, ընդ որում՝ երկու կողմից: Դեռ ինչե՞ր կարող են բացահայտվել, եթե մի քիչ էլ իրար, այսպես ասած, հրահրեն: Շատ բաներ կխոսեն»,– նշեց նա։
Լրագրողները սրբազանից հետաքրքրվեցին՝ հնարավո՞ր է արդյոք, որ հանդիպի ՔՊ պատգամավորների հետ, ինչին ի պատասխան նա ասաց, որ կուզեն՝ կհանդիպի, չեն ուզի՝ չի հանդիպի։