ԵՐԵՎԱՆ, 15 հոկտեմբերի – Sputnik. Մոտ 1 տոննա կոկաինով բեռը, որը տեղաբաշխված էր մրգի 25 արկղերի մեջ, անցել է մաքսատան կանաչ միջանցքով, քանի որ տվյալ ներկրողը մինչ այդ ունեցել է վստահելի վարքագիծ: Այս մասին այսօր ՀՀ ԱԺ պաշտպանության և անվտանգության հարցերի մշտական հանձնաժողովի հրավիրած խորհրդարանական լսումների ժամանակ ասաց ՀՀ ազգային անվտանգության ծառայության պետ Արմեն Աբազյանը։
«Արգելված բեռը անցել է մաքսատան կանաչ միջանցքով, քանի որ մինչ այդ միրգ ներկրողին` «Մրգենի» ընկերությանը (որի բեռնատարներում հայտնաբերվել էր կոկաինը) ներկրման արտոնյալ հնարավորություն տրվել էր»,– ավելացրեց Աբազյանը:
«Մրգենի» ընկերությունը պարբերաբար միրգ է ներկրել, նախկինում առանձնապես խնդիրներ չի ունեցել, և այդ պատճառով նրա բեռներն անցել են կանաչ միջանցքով։ Աբազյանի խոսքով` հերթական ներկրվող խմբաքանակի մեջ մաքսային ծառայության աշխատակիցները կոկաին են հայտնաբերել։ Կոկաինի ընդհանուր ծավալը հետագայում հստակեցվել է` ոչ թե 1 տոննա, այլ մոտ 800 կգ։
Հիշեցնենք` 2024–ի մայիսի 17–ին Հայաստանի ԱԱԾ–ն հայտնեց, որ Էկվադորից Հայաստան է ներմուծվել շուրջ մեկ տոննա կոկաին (մոտ 250 միլիոն եվրո արժողության):
Մայիսի 24-ին ՀՀ վարչապետ Նիկոլ Փաշինյանն ԱԺ–ում հայտարարեց, թե Հայաստան ներմուծված 1 տոննա կոկաինի հասցեատերը բանանի ներկրմամբ զբաղվող հայտնի ընկերություն է, որի սեփականատերը ԱԺ նախկին պատգամավոր է և այժմ գտնվում է հետախուզման մեջ (նկատի ուներ ՀՀԿ–ական նախկին պատգամավոր, ԴԱՀԿ նախկին պետ Միհրան Պողոսյանին,–խմբ.)։ Վերջինս իր հերթին հայտարարություն տարածեց՝ նշելով` ինքն է ԱԱԾ տնօրենին տեղեկացրել, որ կոնտեյների մեջ բանանի փոխարեն կոկաին է եղել։
Մայիսի 30–ին ՀՀ ԱԺ նախկին պատգամավոր, ԴԱՀԿ նախկին ղեկավար Միհրան Պողոսյանի նկատմամբ հայտարարվեց հետախուզում` առանձնապես խոշոր չափերով թմրամիջոց իրացնելու և մաքսանենգություն կատարելու գործի շրջանակներում։