ԵՐԵՎԱՆ, 11 հոկտեմբերի – Sputnik. ՀՀ արդարադատության նախարարի պաշտոնը իսկական կռվախնձոր է դարձել ՔՊ–ի ներսում։ Այդ մասին գրում է «Ժողովուրդ» օրաթերթը։
Նշենք, որ արդարադատության նախարար Գրիգոր Մինասյանը հոկտեմբերի 1-ին հրաժարական տվեց ՀՀ արդարադատության նախարարի պաշտոնից, իսկ հոկտեմբերի 2-ին ՀՀ նախագահը ստորագրեց համապատասխան որոշումը։
Լրատվամիջոցից նշում են, որ իշխանությունները չեն կարողանում որևէ թեկնածուի շուրջ համաձայնության գալ։ Օրաթերթի տեղեկություններով՝ արդարադատության նախարարի թեկնածուի ընտրության հարցում թեժ կռիվ է սկսվել ԱԺ նախագահ Ալեն Սիմոնյանի և ՔՊ խմբակցության պատգամավոր Անդրանիկ Քոչարյանի միջև։
«Ալեն Սիմոնյանը նախ Արփի Դավոյանի և Անդրանիկ Քոչարյանի հետ ձեռնամուխ է եղել, որպեսզի իր հարազատ նախարար Գրիգոր Մինասյանը հեռանա պաշտոնից, ապա վստահեցրել է, որ ամեն ինչ անելու է, որ Արփի Դավոյանը նախարար դառնա։ Վերջին պահին, սակայն, Ալեն Սիմոնյանը անակնկալ ձևով Հրաչյա Հակոբյանի հետ առաջ է տարել իրեն ընկեր դարձած Սիսակ Գաբրիելյանի թեկնածությունը, որը, սակայն, դարձյալ չի ընդունվել»,– գրում է թերթը։
Արդյունքում, վարչության նիստի ժամանակ ոչ մեկ չի պաշտպանել Արփի Դավոյանի թեկնածությունը, ավելին՝ մեծամասնության շրջանում արմատացած է եղել տեսակետը, որ ամոթ կլինի՝ Արփի Դավոյանը նախարար դառնա:
Վարչության նիստին Ալեն Սիմոնյանը ներկա չի եղել. նա երկրից բացակայում է:
Այժմ, ըստ «Ժողովրդի»` Անդրանիկ Քոչարյանը ամեն անկյունում բողոքում է Ալեն Սիմոնյանի վարքագծից, որ իր խոստման տերը չի եղել։
Հավելենք, որ ԱԺ «Քաղաքացիական պայմանագիր» խմբակցությունում ստորագրահավաք էր սկսվել Գրիգոր Մինասյանի պաշտոնանկության համար։ ԶԼՄ–ները գրում էին, որ դրա նախաձեռնողները պատգամավորներ Արփի Դավոյանն ու Անդրանիկ Քոչարյանն էին։ Դրան հաջորդեց արդարադատության նորանշանակ փոխնախարար Սիրվարդ Գևորգյանի հրաժարականը։