Ղրիմում Թեոդոսիայի բնակչին ձերբակալել են լրտեսության համար, նա քաղաքի ծովախորշում ՌԴ Սևծովյան նավատորմի նավերն էր լուսանկարում և դրանց կոորդինատները փոխանցում Ուկրաինայի հատուկ ծառայություններին։ Քրեական գործ է հարուցվել պետական դավաճանության մասին հոդվածով։ Այս մասին հայտնում է շրջանի ԱԴԾ վարչության մամուլի ծառայությունը։
Գերատեսչությունից հայտնել են, որ 30-ամյա տղամարդը Telegram–ի չաթ–բոտի միջոցով տվյալներ էր ուղարկում Թեոդոսիայի ծովածոցի ջրատարածքում գտնվող ռազմանավերի տեղակայման վայրերի մասին, ինչպես նաև ուղարկում էր Թեոդոսիայում գտնվող զորամասերից մեկի լուսանկարները։
Չաթը ստեղծվել էր ուկրաիանկան հատուկ ծառայությունների աջակցությամբ` զինվորական անձնակազմի մասին տվյալների, ռազմական տեխնիկայի տեղաշարժի և քանակի, ՌԴ ԶՈւ ստորաբաժանումների տեղակայման մասին տեղեկատվություն հավաքելու և համակարգելու նպատակով։ Տեղեկությունը փոխանցվել է հակառակորդին հրթիռային հարվածներ հասցնելու ժամանակ այն օգտագործելու համար։
Բացի այդ, ձերբակալված անձն իր անունով հաշիվ էր բացել ուկրաինական բանկում, որից ինքնուրույն հավելվածի միջոցով ՈւԶՈւ–ի աջակցման հիմնադրամներից մեկի միջոցով ընդհանուր 1000 գրիվնայի չափով դրամական փոխանցում է իրականացրել ՈւԶՈւ–ի օգտին։ Կասկածյալը քննության ընթացքում խոստովանական ցուցմունք է տվել։
Ղրիմի հանրապետության և Սևաստոպոլ քաղաքի գծով ՌԴ ԱԴԾ վարչության քննչական բաժինը քրեական գործ է հարուցել ՌԴ ՔՕ 275-րդ հոդվածով («Պետական դավաճանություն»)։ Որպես խափանման միջոց ընտրվել է կալանքը։