ԵՐԵՎԱՆ, 27 սեպտեմբերի – Sputnik. Սահմանազատման գործընթացի հաջորդ էտապի հետ կապված որոշում չկա։ Այդ մասին Արցախյան 44–օրյա պատերազմի տարելիցի օրը Եռաբլուրում լրագրողներին ասաց ՀՀ փոխվարչապետ Մհեր Գրիգորյանը։
«Մենք պետք է կանոնակարգի հետ կապված ներպետական ընթացակարգերն ավարտենք»,– նշեց Գրիգորյանը։
Նրա խոսքով` սահմանազատման գործընթացն ամբողջովին հրապարակային է` թե՛ իրավական մասը, թե՛ փաստացի կատարումը։ Այն բացարձակ օրինական գործընթաց է, ու որևէ հակասություն կանոնակարգի մեջ չկա։
Այն հարցին, թե սահմանազատման գործընթացն իրականացվել է այն պայմաններում, որ թշնամու զինված ուժերը դեռևս շարունակում են գտնվել ՀՀ սուվերեն տարածքում, Գրիգորյանն ասաց, որ սահմանազատման գործընթացի շուրջ պայմանավորվածության հիմնական նպատակն այն է, որ բոլոր նպանատիպ խնդիրները հանգիստ, ֆունդամենտալ, իրավական լուծում ստանան։
Հիշեցնենք` երեկ ՀՀ Սահմանադրական դատարանը որոշում կայացրեց, որ Հայաստանի և Ադրբեջանի միջև սահմանազատման պետական հանձնաժողովի կանոնակարգը համապատասխանում է ՀՀ Սահմանադրությանը։