ԵՐԵՎԱՆ, 26 սեպտեմբերի – Sputnik. Հայ–վրացական սահմանին բեռնատարների կուտակում չկա։ Այս մասին ՀՀ էկոնոմիկայի նախարար Գևորգ Պապոյանը հայտարարեց կառավարության նիստից հետո լրագրողների հետ զրույցում։
Տեղեկություններ են շրջանառվում, որ ավելի քան 500 բեռնատար կա սահմանին, որոնք արդեն մի քանի օր է` կանգնած են։ Նշվում է նաև, որ հայկական կողմի սահմանապահները հավուր պատշաճի չեն կատարում իրենց աշխատանքը։
«Այդպիսի խնդիր չկա, պարբերաբար էլ մենք ստանում ենք նմանատիպ հարցեր, բայց հաճախ, երբ մենք ուսումնասիրում ենք, արդեն խնդիրները լուծված են լինում։ Առևտրաշրջանառությունը մեծանում է և պետք է ենթակառուցվածքները շարունակաբար մեծանան և՛ հայ–վրացական, և ռուս–վրացական սահմաններին»,– ասաց Պապոյանը։
Հարցին` արդյոք Լարսով ճանապարհին այլընտրանք կա, նախարարը շեշտեց` լաստանավն է, բայց այն այժմ պետք չէ, իսկ անհրաժեշտության դեպքում կրկին կշահագործվի։
Նշենք, որ լաստանավային հաղորդակցությունը պետք է Վերին Լարսի անցակետի այլընտրանք դառնար և թույլ տար հայկական բեռները հասցնել Ռուսաստան։ Օգոստոսի 8-ին Գևորգ Պապոյանն ասել էր, որ Հայաստանը լաստանավի կարիք չունի, քանի որ Ռուսաստանը Վերին Լարսի թողունակությունը մեծացրել է։
Հիշեցնենք, որ ՀՀ էկոնոմիկայի նախկին նախարար Վահան Քերոբյանը դեռ հունվարին հայտնել էր, որ լաստանավային հաղորդակցությունը գործարկվել և աշխատել է մի քանի ամիս միայն, քանի որ այն արտահանողների և ներմուծողների համար բավարար հետաքրքրություն չի առաջացրել։