Երևանի Քանաքեռ–Զեյթուն վարչական շրջանի Պարույր Սևակի փողոցում շենք է քանդվել քաղաքապետարանի թույլտվությամբ։ Sputnik Արմենիայի հետ զրույցում ասաց քաղաքապետի մամուլի խոսնակ Հայկ Կոստանյանը։
Նշենք, որ այսօր համացանցում տեսանյութեր են տարածվում, որոնցում երևում է, թե ինչպես է շենքը քանդվում, և փոշու հսկայական ամպ է գոյանում։
«Մեզ դիմել է այդ տարածքում գտնվող շենքերի սեփականատեր ընկերությունը, որպեսզի թույլտվություն ստանա այնտեղի շենքերը քանդելու համար։ Մենք տվել ենք այդ թույլտվությունը ու հորդորել ենք դա չանել պայթեցման եղանակով։ Այսօր իրենք ճոպանների միջոցով քանդման աշխատանքներ են իրականացրել»,– ասաց Կոստանյանը։
Նրա խոսքով` Քանաքեռ–Զեյթունի թաղապետն էլ իրենց փոխանցել է, որ աշխատանքների ժամանակ ներկա են եղել շտապօգնության աշխատակիցները։
Կոստանյանը հավելեց, որ Պարույր Սևակի փողոցում արդեն իսկ լվացման աշխատանքներ են իրականացվել։