ԵՐԵՎԱՆ, 29 օգոստոսի – Sputnik. Telegram–ի հիմնադիր Պավել Դուրովը դատարանի որոշմամբ ազատ է արձակվել 5 մլն եվրոյի չափով գրավի պարտավորությամբ։ Նա պարտավորված կլինի շաբաթական երկու անգամ ոստիկանություն ներկայանալ։ Ֆրանսիայի տարածքը լքել նրան արգելվել է։
Փարիզի դատախազության հայտարարությունից տեղեկանում ենք, որ նրա դեմ նախաքննություն է սկսվել դեռ փետրվարին, այն բանից հետո, երբ մասնագիտական գերատեսչությունները փաստել են, որ Telegram–ը գրեթե չի պատասխանում երեխաների նկատմամբ սեռական բռնության, թմրանյութերի վաճառքի և ատելության հողի վրա առցանց հանցագործությունների դեմ հարուցված քրեական գործերով համագործակցությանն առնչվող հայտերին։
Նրան մեղադրանք է առաջադրվել հետևյալ հանցագործությունների կատարման համար.
Հրաժարում տեղեկություն տրամադրել իրավասու մարմիններին։
Կազմակերպված հանցավոր խմբի կազմում ապօրինի գործարքներ իրականացնելու հնարավորություն ապահովելու նպատակով առցանց հարթակի կառավարում։
Մասնակցություն հաքերական ծրագրերի տարածմանը, հանցավոր խմբի կողմից անչափահասների պոռնոգրաֆիկ բնույթի նկարների տարածմանը, թմրանյութերի տարածմանը, ինչպես նաև մասնակցություն խարդախությանը կազմակերպված հանցավոր խմբի կազմում։
Կազմակերպված հանցավոր խմբի գործողությունների հետևանքով ստացած փողերի լվացում։
Գատնիության ապահովմանն ուղղված գաղտնագրային ծառայությունների մատուցում առանց պարտադիր հայտարարագրման։
Գաղտնագրության միջոցների ապօրինի տրամադրում և ներմուծում։
Դուրովին կարող են առավելագույնը 10 տարվա ազատազրկման դատապարտել և 500 հազար եվրոյի տուգանք սահմանել։
Դուրովը ձերբակալվել էր Փարիզի Լե Բուրժե օդանավակայանում օգոստոսի 24-ին։ Փարիզի դատախազությունն ավելի ուշ հայտնել է, որ նա կալանավորվել է հուլիսի 8-ին «անունը չհրապարակված անձի նկատմամբ» հարուցված գործի շրջանակներում՝ կապված 12 հանցագործություն կատարելու կասկածանքի հետ:
Մասնավորապես, Ֆրանսիայի իշխանությունները հետաքննում են Դուրովի մասնակցությունը համացանցում անօրինական գործունեության մասին տվյալներ թաքցնելու մասով․ բացի այդ, Փարիզում կարծում են, որ նա, իբր կարող է «մասնակից» լինել այնպիսի հանցագործությունների, ինչպիսիք են մանկական պոռնոգրաֆիայի տարածումը և թմրանյութերի վաճառքը: Նա նաև կասկածվում է մեսենջերին օրինական պահանջներ ներկայացրած իշխանությունների հետ չհամագործակցելու մեջ: