ԵՐԵՎԱՆ, 22 օգոստոսի – Sputnik. Մարիուպոլի առևտրային ցանցերից մեկն ավելի քան 1,5 միլիոն ռուբլի արժողությամբ մարդասիրական օգնության խոշոր խմբաքանակ կուղարկի Կուրսկի մարզի բնակիչների համար։ Տեղեկությունը հայտնում է ՌԻԱ Նովոստին՝ հղում անելով քաղաքի վարչակազմին:
Ավելի վաղ քաղաքային վարչակազմի ղեկավարի տեղակալ Բոգդան Պերեպեչայը ՌԻԱ Նովոստիին հայտնել էր, որ մարիուպոլցիները 40 տոննա մարդասիրական օգնություն են հավաքել և այն փոխանցել Կուրսկի և Բելգորոդի մարզերի բնակիչներին:
«Քաղաքային առևտրային ցանցերից մեկը սեփական նախաձեռնությամբ մարդասիրական օգնության խոշոր խմբաքանակ է հավաքել Կուրսկի մարզի տուժած բնակիչների համար», - ասվում է հաղորդագրության մեջ:
Բեռը, որում ներառված են սննդամթերք, ալյուր, բուսական յուղ, շշալցված ջուր, հյութեր և երկար պահպանման ժամկետ ունեցող կաթ, կառաքվի առաջիկայում։
«Մարիուպոլցիները հիշում են, թե ինչպես ամբողջ Ռուսաստանը մեզ աջակցեց դժվար պահերին, ուստի այսօր չեն կարող անմասն մնալ։ Կուրսկի և Բելգորոդի մարզերի բնակիչներին օգնելը մեր քաղաքացիական պարտքն է», - ասել է առևտրային ցանցի ղեկավար Միխայիլ Մայստրենկոն։
Հիշեցնենք` ՌԴ ԶՈւ գլխավոր շտաբի պետ Վալերի Գերասիմովն ավելի վաղ հայտնել էր, որ օգոստոսի 6-ին՝ առավոտյան ժամը 5: 30-ին, Ուկրաինայի զինված ուժերի շուրջ հազար հոգանոց խմբավորումն անցել է հարձակման` նպատակ ունենալով տարածքներ գրավել Կուրսկի մարզում։ Ուկրաինական զինուժի առաջխաղացումը դեպի ՌԴ տարածքի խորքը կասեցվել է։ ՌԴ ԶՈւ գլխավոր շտաբի պետը նշել էր, որ Կուրսկի մարզում գործողությունը կավարտվի, երբ հակառակորդը կկջախջախվի, իսկ ռուսական զորքը դուրս կգա ՌԴ պետական սահման։ Ինչպես օգոստոսի 22-ին հայտնել Է ՌԴ պաշտպանության նախարարությունը, Կուրսկի ուղղությամբ ռազմական գործողությունների ընթացքում Ուկրաինայի զինված ուժերը կորցրել են ավելի քան 4,7 հազար զինծառայող, 68 տանկ:
Ռուսաստանի նախագահ Վլադիմիր Պուտինը, մեկնաբանելով Կուրսկի մարզում տիրող իրավիճակը, հայտարարել է, որ Կիևի ռեժիմը հերթական լայնածավալ սադրանքն է ձեռնարկել, անկանոն կրակոցներ է արձակում, այդ թվում՝ քաղաքացիական թիրախների ուղղությամբ: ՌԴ նախագահը վստահեցրել է, որ հակառակորդն արժանի պատասխան կստանա, Ռուսաստանի զինված ուժերի առջև դրված բոլոր նպատակներին կհասնեն:
Կուրսկի, ինչպես նաև Բելգորոդի և Բրյանսկի մարզերում քաղաքացիների անվտանգությունն ապահովելու համար հակաահաբեկչական գործողության ռեժիմ է սահմանվել։