Նուբարաշենի աղբավայրում բազմահարկ շենքի բարձրությամբ աղբ է այրվում

Հայաստանի ամենախոշոր աղբավայրում բռնկված հրդեհը, ըստ նախնական տեղեկությունների, կարող է մարվել մինչև շաբաթվա վերջ: Այս մասին Sputnik Արմենիային հայտնեց «Երևանի քաղաքային նոր աղբավայր» ՓԲԸ–ի տնօրենի պաշտոնակատար Վահե Վարդապետյանը։

Մասնագետներին հաջողվել է նվազեցնել հրդեհի մակերեսը, բայց դեռ 1 հա տարածք կա, որտեղ պետք է աշխատանքներ իրականացվեն։

Նրա խոսքով` քաղաքապետարանի իրականացրած պրոֆիլակտիկ աշխատանքները թույլ են տվել կրճատել հրդեհի մասշտաբները, որպեսզի դրանք չհասնեն նախորդ տարիների հրդեհների ծավալներին։

Արդեն չորրորդ օրն է, ինչ մասնագետներն աշխատում են շուրջօրյա ռեժիմով։ Աղբը տեղ–տեղ հասնում է բարձրահարկ շենքի բարձրության։ Չորս օրվա ընթացքում աղբավայր է հասցվել 200 բեռնատար հող, 500 տոննա ջուր։ Հրդեհաշիջմանը մասնակցում են 22 հրշեջ հաշվարկ, փրկարար ծառայության 110 աշխատակից:

Հրդեհների թիվը կրճատելու համար 2009 թվականից աղբավայրում գործում է կենսագազի հավաքման և օգտահանման կայան: Այն մշակում է առաջացած գազերը աղբավայրի տարածքի միայն մեկ երրորդում (10 հա)։ Գազերը (դրանց 50% -ը մեթան է) կայան են մտնում ստորգետնյա 28 հորատանցքերի միջոցով։ Մեկ ժամում կայանը այրում է 260-300 խորանարդ մետր գազ։

Քիմիական ռեակցիայի արդյունքում արտանետվում է ածխաթթու գազ, որը պակաս վտանգավոր է, քան մեթանը։ Քաղաքային իշխանությունների գնահատմամբ՝ դա թույլ է տալիս մի քանի անգամ կրճատել աղբավայրից գազերի վտանգավոր արտանետումները։

Հետագայում նախատեսվում է փակել այս աղբավայրը և կառուցել նորը, որը կհամապատասխանի միջազգային չափանիշներին։

Թե աղբավայրի այրման հետևանքով արտանետված գազերը ինչ վնաս են հասցրել քաղաքին, հայտնի կդառնա մի քանի օրից: Շրջակա միջավայրի նախարարության համապատասխան կառույցներն օդի նմուշներ են վերցրել հետագա փորձաքննության համար։