ԵՐԵՎԱՆ, 9 հուլիսի – Sputnik. ՀՀ նախկին ոստիկանապետ Վլադիմիր Գասպարյանը քայլեր է ձեռնարկելու, որպեսզի արդարացվի։ Նա այդ մասին հայտարարեց դատականի նիստից հետո ճեպազրույցի ժամանակ։
Ավելի վաղ հայտնել էինք, որ Վլադիմիր Գասպարյանն ու նախկին փոխոստիկանապետ Լևոն Երանոսյանը մեղավոր ճանաչվեցին ու դատապարտվեցին 6 տարվա ազատազրկման, սակայն որոշ հոդվածներով պատժի կրումից ազատվեցին համաներմամբ, որոշ հոդվածներով՝ վաղեմության ժամկետը լրանալու հիմքով։
«Հենց վճիռն ունենանք, դրանից հետո միայն կանենք պաշտոնական հայտարարություն, թե որոնք են լինելու մեր հաջորդ քայլերը։ Քանի որ, այնուամենայնիվ, դատարանը ինձ մեղավոր ճանաչեց, ես գնալու եմ արդարացման ճանապարհով»,– ասացնախկին ոստիկանապետը։
Գասպարյանը կարծում է, որ իր դեմ հարուցված գործը քաղաքական հետապնդում չի եղել։
«Մի քանի արկածախնդիրներ, սակայն, իրենց ղեկավարներին դուր գալու համար փորձել են մի քիչ ճարպիկություն անել»,– նշեց նա:
Ինչ վերաբերում է իր գործը քննող դատավոր Վարդգես Սարգսյանին, ՀՀ նախկին ոստիկանապետն ասաց, որ նրա աշխատանքից գոհ է ու համարում է պրոֆեսիոնալ։ Դիտարկմանը, որ նրա գնահատականը կարող է վնասել դատավորին, Գասպարյանն արձագանքեց. «Եթե այդպես է, ապա ես ներողություն եմ խնդրում»։
Հիշեցնենք՝ 2023 թ. հուլիսին ՀՀ հակակոռուպցիոն կոմիտեն հաղորդագրություն տարածեց, ըստ որի` ՀՀ նախկին ոստիկանապետ Վլադիմիր Գասպարյանն օրինականացրել (լվացել) է հանցավոր ճանապարհով ստացված ընդհանուր շուրջ 2 մլրդ դրամի գույք:
Վլադիմիր Գասպարյանին մեղադրանք առաջադրվեց մի շարք հոդվածներով` ՀՀ նախկին քրեական օրենսգրքի 190-րդ հոդվածի 3-րդ մասի 1-ին և 3-րդ կետերով, 308-րդ հոդվածի 2-րդ մասով ՀՀ քրեական օրենսգրքի 256-րդ հոդվածի 3-րդ մասի 3-րդ կետով, 44-256-րդ հոդվածի 3-րդ մասի 3-րդ կետով 445-րդ հոդվածի 1-ին մասով: