ԵՐԵՎԱՆ, 6 հուլիսի – Sputnik. ՀՀ վարչապետ Նիկոլ Փաշինյանն այցելել է Տավուշի մարզ, եղել է Կիրանց գյուղում։ Այս մասին նա հայտնել է իր Telegram ալիքում և տեսանյութ հրապարակել։
Ինչպես հայտնի է, Հայաստանի և Ադրբեջանի միջև սահմանազատման հետևանքով այստեղ նոր ճանապարհ կառուցելու անհրաժեշտություն է առաջացել։
«Կիրանցի նոր ճանապարհը շուտով պատրաստ կլինի»,– գրել է նա։
Տեսանյութում երևում է, որ ՀՀ վարչապետին ուղեկցում է Տավուշի մարզպետ Հայկ Ղալումյանը։
Փաշինյանը ծանոթացել է կատարվող աշխատանքներին, որոշ հարցեր ուղղել շինարարությունն իրականացնող անձանց։
Հիշեցնենք, որ ՀՀ տարածքային կառավարման և ենթակառուցվածքների նախարար Գնել Սանոսյանը հունիսի 23-ին Կիրանց այցելելուց հետո ասել էր` նախատեսվում է, որ շինարարությունը 2 ամսից կավարտվի։
Հավելենք, որ Աճարկուտով անցնող ճանապարհը Կիրանց գյուղ գնալու այլընտրանքային ճանապարհ կդառնա այն բանից հետո, երբ սահմանազատման շրջանակներում բնակավայրի մուտքի ճանապարհային կամուրջը կհանձնվի Ադրբեջանին։ Դելիմիտացիայի շրջանակներում Կիրանցի տարածքի մի մասը՝ երկու տուն, կամուրջ, դեպի Վրաստան միջպետական ճանապարհի հատված և նախապես 50-ից ավելի հողամասեր, պետք է անցնեն Ադրբեջանին։