ԵՐԵՎԱՆ, 25 հունիսի – Sputnik. Քենիայի անվտանգության բոլոր ուժերը մոբիլիզացվել են բողոքի ընդվզումներին հակազդելու համար։ Այս մասին հայտարարել է երկրի նախագահ Ուիլյամ Ռուտոն: Տեղեկությունը հայտնում են տեղական ԶԼՄ-ները:
«Մոբիլիզացվել են երկրի անվտանգության ապահովման բոլոր ուժերը՝ բողոքի ընդվզումներին հակազդելու համար»,– հայտարարել է Ռուտոն։
Այն, որ Քենիայի զինված ուժերը մոբիլիզացվել են երկրում անկարգությունների հարցում ոստիկանությանը աջակցելու համար, քիչ առաջ հայտարարել է նաև երկրի պաշտպանության նախարար Ադեն Դուալեն:
«Քենիայի զինված ուժերը 2024 թվականի հունիսի 25–ին մոբիլիզացվել են ազգային ոստիկանությանը աջակցելու համար՝ ի պատասխան արտակարգ դրության, որն առաջացել է Քենիայի Հանրապետության տարբեր հատվածներում տեղի ունեցող բողոքի ակցիաների պատճառով, որոնք հանգեցրել են կենսական նշանակության ենթակառուցվածքի ոչնչացմանն ու վնասմանը»,– հայտարարել է Դուալեն X սոցցանցում:
Քենիայում բողոքի ալիք է բարձրացել, որը պայմանավորված է մի շարք ապրանքների և ծառայությունների հարկերը բարձրացնելու` կառավարության ծրագրերի հետ: Ցուցարարները գրոհել են Քենիայի խորհրդարանի շենքը, այնտեղ անկարգություններ սկսել։ Պատգամավորներին տարհանել են թունելներով։
Անկարգությունների մասնակիցները հրկիզել են մի շարք վարչական շենքեր, ավերել մի շարք սուպերմարկետներ։
Ոստիկանությունը ցուցարարներին ցրելու համար արցունքաբեր գազ և ռետինե փամփուշտներ է կիրառել։
Վերջին տվյալներով՝ անկարգությունների հետևանքով զոհվել է 10 մարդ, ավելի քան 50–ը տուժել են։