ԵՐԵՎԱՆ, 13 հունիսի - Sputnik. «Տավուշը հանուն հայրենիքի» շարժման ակտիվիստներից Սուրեն Պետրոսյանը, որի գտնվելու վայրը հունիսի 12–ին ԱԺ շենքի մոտ տեղի ունեցած բախումներից հետո անհայտ էր, քիչ առաջ կապ է հաստատել ընտանիքի անդամների հետ։ Այս մասին Sputnik Արմենիային հայտնեց նրա հարազատներից մեկը։
Պետրոսյանն ասել է, որ քիչ ավելի ուշ կրկին կապ կհաստատի։ Այլ տեղեկություն այս պահին չկա։
«Հինգ իրավապաշտպանների» նախաձեռնության փաստաբան Ռուբեն Մելիքյանն էլ Sputnik Արմենիայի հետ զրույցում նշեց, որ իր պրակտիկայում նման դեպք երբեք չի եղել, որ 1 օր անձին թույլ չտան ընտանիքի անդամներից մեկին կամ որևէ փաստաբանի հետ կապ հաստատել։
Հիշեցնենք, որ հունիսի 12-ին ԱԺ շենքի մոտ բախումներ սկսվեցին ոստիկանների և «Տավուշը հանուն հայրենիքի» շարժման անդամների ու կողմնակիցների միջև։ Ոստիկանությունը լուսաձայնային նռնակներ կիրառեց, ինչի հետևանքով 101 անձ վնասվածք ստացավ, այդ թվում` ոստիկաններ։
Փաստաբան Ռուբեն Մելիքյանը հունիսի 13–ին Sputnik Արմենիային հայտնեց, որ Երևանի Բաղրամյան պողոտայում տեղի ունեցած ակցիայից հետո հանցանք կատարելու կասկածով ձերբակալված անձանց թիվը հասել է 28–ի։