ԵՐԵՎԱՆ, 13 հունիսի - Sputnik. «Լուսավոր Հայաստան» կուսակցության առաջնորդ Էդմոն Մարուքյանն անօգուտ սիրախաղ է անվանել Հայաստանի մասնակցությունը Բեռլինում կայացած Ուկրաինայի վերականգնման համաժողովին։
Ուկրաինայի վերականգնմանը նվիրված միջազգային խորհրդաժողովը տեղի է ունեցել հունիսի 11-12-ը Բեռլինում: Հայաստանը խորհրդաժողովում ներկայացված էր փոխարտգործնախարարի մակարդակով։
Խոսելով բեռլինյան կոնֆերանսին Հայաստանի մասնակցության մասին՝ նա նկատեց, որ առաջին հայացքից կարող է թվալ՝ քանի որ Վրաստանը (վարչապետի և արտգործնախարարի մակարդակով) և Ադրբեջանը (արտգործնախարարի մակարդակով) մասնակցում են, ուրեմն մենք էլ պետք է գնանք այնտեղ։ Սակայն նա վստահ է, որ Հայաստանը ոչ մի կապ չունի Ուկրաինայի վերականգնման հետ։ Ընդ որում, նա վստահ է, որ ո՛չ ԱՄՆ-ից, ո՛չ ԵՄ-ից այդ միջոցառմանը Հայաստանի պարտադիր մասնակցության մասին ազդակներ չեն ստացվել: Ըստ Մարուքյանի՝ սա արկածախնդրություն է։
«Ի՞նչն ենք վերականգնում, եթե պատերազմը դեռ չի ավարտվել: Մենք մեր երկիրը եկեք վերականգնենք.150 հազար փախստական ունենք, 200 միլիոն դրամի վնաս է հասցվել Դեբեդ գետի հունից դուրս գալու հետևանքով, մեր երկրի վերականգնմամբ ո՞վ է զբաղվել։ Էդ է, mismanagement է՝ անարդյունավետ կառավարում»,- հայտարարել է քաղաքական գործիչը իր Ֆեյսբուքյան էջում հրապարակված տեսանյութում։
Մարուքյանը նկատում է, որ վերջին շրջանում Հայաստանում միտում է նկատվում ամեն քայլափոխի խոսել Ուկրաինայի մասին։ Որոշ քաղաքական գործիչներ և «փորձագետներ» որպես «հաջողության պատմություն» օրինակ են բերում Ուկրաինան։ Եվ Հայաստանի մասնակցությունը Բեռլինի կոնֆերանսին ընդամենը այդ միտման շարունակությունն էր։
Մարուքյանը կարծում է, որՈւկրաինայի վերականգնմանը նվիրված Բեռլինյան կոնֆերանսին մասնակցելու փոխարեն, Հայաստանն ինքը կարող էր կազմակերպել ներքին տեղահանված հայերին Լեռնային Ղարաբաղ վերադարձնելու կամ Սյունիքում, Վայոց Ձորում և Գեղարքունիքում տարածքներ օկուպացրած ադրբեջանական զորքերի դուրսբերման խորհրդաժողով:
Նա նաև անդրադարձել է Ուկրաինայում Հայաստանի դեսպան Վլադիմիր Կարապետյանի և Երևանի Նոր Նորք վարչական շրջանի ղեկավար Տիգրան Տեր-Մարգարյանի այցին ուկրաինական Բուչա:
«Ուկրաինայում Ռուսաստանին մեղադրում են Բուչայում մարդկության դեմ հանցագործությունների մեջ։ Հայաստանը գնացել, քիթը խոթել է Բուչայի մեջ, որ ի՞նչ անի։ Ինչո՞ւ ենք մենք մտնում այս թեմաների մեջ: Այսօր Հայաստանի գյուղատնտեսությունը վարկերի տակ է։ Ինչ-որ մեկը վարկերով ծաղիկներ է աճեցնում և արտահանում Ռուսաստան, իսկ ինչ-որ մեկը ինչ-որ բանով վաստակում է։ Չե՞ք մտածել, որ նման գործողություններով հարվածի տակ եք դնում այդ մարդկանց։ Հայաստանի միջոցով ոսկի էր վաճառվում, դադարեցվել է, ինչո՞ւ, ո՞վ է փակել այդ հնարավորությունը։ Պետք է ուսումնասիրել այդ հարցը և հասկանալ, թե ինչ է տեղի ունեցել, որքան գումարից է զրկվել Հայաստանը»,- նշում է «Լուսավոր Հայաստանի» առաջնորդը։
Քաղաքական գործիչը խորհուրդ է տալիս մտածել, թե ինչպես ստացվեց, որ մենք զրկվեցինք Ռուսաստան ավտոմեքենաների վերարտահանման հնարավորությունից, և կարող է պատահել, որ մենք մեր գործողություններով հարվածում ենք մեր սեփական ժողովրդին, երկրի տնտեսությանը, վարկեր ունեցող քաղաքացիներին։