Ազգային շենքի մոտ մեծ թվով ոստիկաններ ու ԱԱԾ–ականներ են հավաքված։ Այդ տարածքում են գտնվում «Տավուշը հանուն հայրենիքի» շարժման անդամներն ու կողմնակիցները։ Իսկ խորհրդարանի ներսում կառավարության անդամներն են` ՀՀ վարչապետ Նիկոլ Փաշինյանի գլխավորությամբ։
«Տավուշը հանուն հայրենիքի» շարժման անդամներն ու կողմնակիցները, որոնք պահանջում են գործող իշխանության հրաժարականը, հունիսի 10-ից փակ են պահում Բաղրամյան պողոտայի մի հատվածը։ Այսօր առավոտյան այդ տարածքում ավելացվել է ոստիկանների թիվը, քանի որ ԱԺ են եկել կառավարության անդամները։ Մեծաթիվ ոստիկանական ուժեր են տեղակայված Բաղրամյան–Դեմիրճյան խաչմերուկում, իսկ Պռոշյան–Դեմիրճյան խաչմերուկում կարմիրբերետավորներ են, Պռոշյան փողոցում` սևբերետավորները։
«Տավուշը հանուն հայրենիքի» շարժման առաջնորդ Բագրատ սրբազանն ավելի վաղ հայտարարել էր, որ ժամը 15։30-ից հանրահավաք է լինելու, քանի որ շատ կարևոր գործ ունեն անելու։