ԵՐԵՎԱՆ, 11 հունիսի – Sputnik. Երևանի Մաշտոցի պողոտայում տեղի ունեցած դանակահարությունը սկսվել է վիճաբանությունից։ Տեղեկությունը հայտնում է ՀՀ քննչական կոմիտեն։
Ավելի վաղ տեղեկացրել էինք, որ հանգստյան օրերին Երևանի կենտրոնում դանակահարության երկու դեպք է եղել, կա սպանված և վիրավորներ։ Ավելի ուշ ՔԿ–ն հայտնեց, որ դանակահարության դեպքերից մեկի պատճառը իրար երկար նայելն է եղել, բարեբախտաբար ոչ մեկը չի մահացել։
Մյուս դեպքը, որ տեղի է ունեցել գրեթե նույն ժամին, ավարտվել է 19-ամյա երիտասարդի մահով։
Ըստ ՀՀ քննչական կոմիտեի այսօրվա հաղորդագրության` հունիսի 10-ի լույս 11–ի գիշերը իրավապահներն ահազանգեր են ստացել, որ «Հերացի» թիվ 1 հիվանդանոցային համալիր և «Էրեբունի» ԲԿ են տեղափոխվել Արմավիրի մարզի 19–ամյա և Գեղարքունիքի մարզի 24–ամյա բնակիչներ, որոնցից մեկը՝ 19–ամյա երիտասարդը, գտնվում է ծայրահեղ ծանր վիճակում։ Նույն օրը գրանցվել է վերջինիս կենսաբանական մահը։
Դեպքի առթիվ նախաձեռնվել է քրեական վարույթ։
Պարզվել է` հունիսի 10-ին՝ ժամը 01:10-ի սահմաններում, Երևան քաղաքի Մաշտոցի պողոտա 42 հասցեի մոտ մի խումբ անձինք վիճաբանել են, հայհոյանքներ հնչեցրել, որի ընթացքում վիճաբանության մասնակիցներից մեկն իր մոտ գտնվող կտրող-ծակող առարկայով հարվածներ է հասցրել վիճաբանության մյուս մասնակիցներին։
Կատարվել է դեպքի վայրի զննություն, որի ընթացքում հայտնաբերվել և առգրավվել են արնանման հետքեր և այլ իրեր, հարցաքննվել են մի շարք անձինք, նշանակվել են դատաբժշկական փորձաքննություններ։
Ստացվել են դեպքի վայրը և դեպքը տեսանկարահանող երկու սարքերի տեսագրություններ և զննվել։
Պարզվել է ենթադրյալ հանցագործությունը կատարած անձի ինքնությունը. նա Սյունիքի մարզի բնակիչ է՝ ծնված 2000թ․։
Նախաքննությունը շարունակվում է: Ձեռնարկվում են անհրաժեշտ միջոցառումներ՝ վերջինիս հայտնաբերելու և վարույթն իրականացնող մարմին ներկայացնելու ուղղությամբ։