Կամ պատասխանատվություն ստանձնեք, կամ հայտարարեք, որ կապ չունեք մեզ հետ. Բագրատ սրբազան

ԵՐԵՎԱՆ, 2 հունիսի – Sputnik. «Տավուշը հանուն հայրենիքի» շարժումը չի մարելու, պետք չէ այդ մասին խոսել կամ անհանգստանալ։ Այս մասին հայտարարեց Բագրատ սրբազանը Սուրբ Աննա եկեղեցու բակում ամփոփելով անցած շաբաթը։

Նա հայտարարեց, որ եթե որոշ մարդիկ այս կամ այն անկյուններում խոսում են , թե շարժումը մարելու է, բայց հետո գալիս լրագրողների մոտ լուրջ դեմքով այլ բան են ասում, ինքը գիտի այդ մասին։

«Դիմում եմ բոլոր հասարակական կազմակերպություններին, նախաձեռնություններին , բոլոր քաղաքական միավորներին, կուսակցություններին. կամ հստակ, տեսանելի, մասնակցային, ամեն մեկդ ձեր բաժնով պատասխանատվություն ստանձնեք շարժման համար, կամ ուղղակի հայտարարեք, որ կապ չունեք այս ամեն ինչի հետ»,–ասաց Բագրատ սրբազանը։

Հիշեցնենք, որ երեկ «Տավուշը հանուն հայրենիքի» շարժման կողմնակիցները ավտոերթով մեկնել էին Գյումրի ու հանրահավաք անցկացրել։

Հայաստանում բողոքի ակցիաներ սկսվեցին, երբ ապրիլի 19-ին հայտնի դարձավ, որ Երևանն ու Բաքուն պայմանավորվել են սահմանազատումը սկսել Տավուշի հատվածից։ Հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։

Մայիսի 26–ին Հանրապետության հրապարակում տեղի ունեցած հանրահավաքի ժամանակ հայտարարվեց, որ «Տավուշը հանուն հայրենիքի» անցումային կառավարության վարչապետի թեկնածուն Բագրատ սրբազանն է։