ԵՐԵՎԱՆ, 29 մայիսի - Sputnik. ՀՀ վարչապետ Նիկոլ Փաշինյանը քննադատել է գործող կրթական համակարգը այն բանի համար, որ այն շեշտը դնում է արգելքների և սահմանափակումների վրա, փոխանակ մարդկանց սովորեցնի վայելել կյանքը և ձգտել բարեկեցության:
Պետբյուջեի կատարողականի վերաբերյալ խորհրդարանական քննարկումների ժամանակ նա հայտարարել է, որ Հայաստանում «մարդկանց սովորեցնում են տառապել, ոչ թե ապրել»։
Նրա կարծիքով` մարդկանց մեջ կյանքի դրական ընկալումը և պարզ ուրախությունները վայելելու ունակությունը զարգացնելու փոխարեն, կրթական համակարգը կենտրոնացած է այն բանի վրա, թե ինչ չի կարելի անել:
«Մեզ սովորեցնում են, որ չի կարելի շորտով նստել և սուրճ խմել պատշգամբում, փոխանակ մարդկանց սովորեցնեն վայելել կյանքը և ձգտել բարեկեցության»,-հայտարարել է վարչապետը:
Նրա խոսքով՝ կրթությունը պետք է ցույց տա, որ լավ կյանքի ճանապարհը պրոֆեսիոնալիզմի, քրտնաջան աշխատանքի և սեփական տաղանդների զարգացման միջով է անցնում: Սա պետք է ներառի հարստանալու և ուրիշներին հարստացնելու ունակությունը:
Նա ընդգծել է, որ կառավարությունը ձգտում է հաղթահարել կղերական-ֆեոդալական տրամաբանությունը, որը մարդկանց ներշնչել է, որ տառապանքը նորմալ է և նույնիսկ լավ է: Այս տրամաբանությունը ծառայում էր ժողովրդի տառապանքները արդարացնելու համար, մինչդեռ շքեղ մեքենաներով շրջող էլիտաները երբեք էլ դժվարություններ չեն ունենում ո՛չ պատերազմների ժամանակ, ո՛չ խաղաղ ժամանակ, ո՛չ էլ համաճարակների ժամանակ։ Սակայն այդ փորձերը, նրա խոսքով, դիմադրության հանդիպեցին։