ԵՐԵՎԱՆ, 26 մայիսի – Sputnik․ Ալավերդում անհետ կորած մարդիկ կան։ Տեղեկությունը հայտնում է «Անկյուն +3» TV–ին։
Նշվում է, որ Ալավերդիի «Կամչատկա» կոչվող թաղամասն ամբողջովին մեկուսացված է արտաքին աշխարհից։ Թաղամաս տանող կամուրջը փլվել է, բնակիչները զրկված են բոլոր կոմունիկացիաներից։
Բնակիչներից մեկը պատմում է, որ հեղեղն ամբողջ տունը քշել, տարել է, անասուններից միայն շանն է կարողացել փրկել։
«Մարդկային կորուստների հետ էս ամենը չեմ համեմատի, թող միայն անփորձանք մարդկանց տարհանեն»,– ասաց կինը։
Ի դեպ, Սանահին կայարան թաղամասում մի քանի ավտոտնակ է գետը քշել։
Մեկ ուրիշ բնակիչ էլ հիշում է, որ էլի նման հեղեղ եղել է, սակայն վնասն այսպիսի չափերի չի հասել։
Այս գիշեր տեղացած հորդառատ անձրևների հետևանքով ՀՀ մի շարք մարզերում փակվել են ճանապարհներ, տներն ու ավտոմեքենաները հայտնվել են հեղեղի տակ, արգելափակվել են մարդիկ։
Ավելի վաղ հայտնել էինք, որ մայիսի 26–ի գիշերը Դեբեդ գետի վարարման հետևանքով Մ-6 միջպետական ճանապարհը երկկողմանի փակ է երթևեկության համար։ Վարարման հետևանքով, նախնական տվյալներով, կա մեկ զոհ, իսկ մեկ քաղաքացի ընկել է գետը։
Հորդառատ անձրևների հետևանքով վարարել է նաև Աղստև գետը, Տավուշի որոշ հատվածներ ևս ջրով են ծածկվել։