ԵՐԵՎԱՆ, 22 մայիսի - Sputnik. ՀՀ Պետական եկամուտների կոմիտեի մաքսանենգության դեմ պայքարի վարչությունը բացահայտել է դեղամիջոցների մաքսանենգության 2 դեպք: Տեղեկությունը հայտնում է ՊԵԿ մամուլի ծառայությունը։
Նշվում է, որ վարչությունը տվյալներ է ստացել, որ Գ. Կ.-ն, հանդիսանալով «Հարավկովկասյան Երկաթուղի» ՓԲ ընկերության Երևան-Թբիլիսի-Երևան գնացքներից մեկի պետ, Վրաստանի մայրաքաղաք Թբիլիսիից Երևան ուղևորվող գնացքի երթուղով պարբերաբար ՀՀ է տեղափոխում մաքսային հսկղությունից թաքցված դեղորայք։
Նշվում է, որ օպերատիվ տվյալներն իրացնելիս ՊԵԿ աշխատակիցները Երևանի Սասունցի Դավիթ կայարանի մուտքի մոտ` ավտոկայանատեղիում, մոտեցել են քաղաքացի Գ. Կ.-ին, որն այդ պահին փորձել է իր մեքենայի բեռնախցիկում տեղավորել իր ներմուծած շուրջ 25 կգ քաշով երկու մեծ սև պոլիէթիլենային տոպրակ:
«Գ. Կ-ն հրավիրվել է ՊԵԿ մաքսանենգության դեմ պայքարի վարչություն, որտեղ ներկայացրել է իր ձեռքի պոլիէթիլենային տոպրակներում առկա ապրանքները: Ուսումնասիրությունից հետո պարզվել է, որ ամբողջը դեղորայք է եղել։ Դեպքի առնչությամբ կազմվել է մաքսային կանոնների խախտման արձանագրություն, որը տրամադրվել է ՊԵԿ իրավաբանական վարչություն»,–նշված է հաղորդագրության մեջ։
Մեկ այլ դեպքով էլ ՊԵԿ–ում տեղեկություններ են ստացվել, որ քաղաքացի Դ. Ս.-ն իր տրանսպորտային միջոցով, մաքսային հսկողությունից թաքցնելով, Վրաստանից Հայաստան է տեղափոխում դեղորայք:
Նշվում է , որ ՊԵԿ աշխատակիցները Դ. Ս.-ի տրանսպորտային միջոցը Վրաստանից ժամանելուց հետո ուղեկցել են «Ուրբան Լոջիստիք Սերվիսիս» ՓԲ ընկերության մաքսային հսկողության գոտի: Մաքսային զննման արդյունքում տվյալ տրանսպորտային միջոցի դռներից և բեռնախցիկում առկա գազաբալոնային համակարգի մեջ հայտնաբերվել են մաքսային հսկողությունից թաքցված ընդհանուր 24 կգ քաշով տարբեր տեսակի դեղամիջոցներ։
Կազմվել է մաքսային կանոնների խախտման արձանագրություն, որը տրամադրվել է ՀՀ ՊԵԿ իրավաբանական վարչություն: