ԵՐԵՎԱՆ, 18 մայիսի – Sputnik. «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը և քաղաքական ուժերի ներկայացուցիչները միասնական լինելու և միասնական դեպի իշխանափոխություն գնալու պատրաստակամություն ունեն։ Լրագրողների հետ զրույցում այս հայտարարությունն արեց «ՀայաՔվե» շարժման անդամ Մենուա Սողոմոնյանը։
Ավելի վաղ հայտնել էինք, որ Բագրատ սրբազանը քաղաքական ուժերի հետ հանդիպում է անցկացնում։
«Հանդիպումը տարբեր քաղաքական ուժերի ներկայացուցիչների հետ անցնում է անսպասելի լավ և կառուցողական մթնոլորտում: Սպասելիքները գերազանցված են։ Չէի կարող պատկերացնել, որ նման միասնություն կլինի քաղաքական ուժերի մեջ, որոնք սովորաբար բզկտում են միմյանց։ Կա ըմբռնում, որ մենք նույն նավակում ենք, ծովն է փոթորկված է և խիստ ալեկոծ։ Պետք է միասնական գործողություններով դուրս գալ իրավիճակից։ Տարբեր հարցերի շուրջ տարբեր տեսակետներ հնչում են, բայց միասնական լինելու, միասնական դեպի իշխանափոխություն գնալու, երկիրն էլ խորագույն անվտանգային ճգնաժամից հանելու պատրաստակամություն կա»,– ասաց նա։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվեցին սահմանազատումը սկսել Տավուշի մարզից։ Հայտարարվեց, որ սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարեց, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Վերջին տվյալներով` հայ–ադրբեջանական սահմանին արդեն 40 սահմանային սյուն է տեղադրվել։
Հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։
ՀՀ ԱԳՆ–ն մայիսի 15-ին հայտնեց, որ Հայաստանի և Ադրբեջանի սահմանազատման հանձնաժողովները նոր պայմանավորվածություններ են ձեռք բերել։ ՀՀ վարչապետի աշխատակազմը պարզաբանեց, որ, ըստ այդ պայմանավորվածությունների, Կիրանցում ճանապարհի տեղափոխման ու գույքային խնդիր է առաջանալու։