ԵՐԵՎԱՆ, 12 մայիսի – Sputnik. ՀՀ վարչապետին անվստահություն հայտնելու առաջին փուլն հաղթահարված է։ Այս մասին Հանրապետության հրապարակում ընթացող «Տավուշը հանուն հայրենիքի» նախաձեռնության հանրահավաքին ասաց նախաձեռնության ղեկավար, Տավուշի թեմի առաջնորդ Բագրատ արքեպիսկոպոս Գալստանյանը։
«ԱԺ 2 ընդդիմադիր խմբակցությունները պատրաստակամություն են հայտնել քվեարկելու կառավարության ղեկավարին անվստահություն հայտնելու համար։ Մեկ ձայն պակասում էր առաջին քայլի համար։ Հանդիպել եմ անկախ պատգամավոր Իշխան Զաքարյանին, և նա չի մերժել միանալու այս գործընթացին»,–ասաց նա հանրահավաքին։
Հավելեց` մնացել է չափազանց կարևոր 2 հարց` վարչապետի թեկնածուի և իմպիչմենտի մյուս քայլի համար 18 պատգամավորի ստորագրության հարցը։
«Ես պատրաստ եմ ցանկացած պատասխանատվություն ստանձնել Հայոց հայրապետի օրհնությամբ և մեր ժողովրդի ցանկությամբ։ Սակայն կան հարցեր, որոնք վերաբերյալ պետք են և անհրաժեշտ են իրավական դաշտում քննարկումները, որոնք առաջիկա օրերի ընթացքում կհստակեցվեն և կներկայացվեն ձեզ»,–ասաց Բագրատ սրբազանը։
Հավելեց, որ այդ հարցերը քննարկվելու են քաղաքական բոլոր ուժերի հետ, այդ թվում՝ «Քաղաքացիական պայմանագիր» կուսակցության հետ։
Հիշեցնենք` «Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից երթով եկել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։
Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։