ԵՐԵՎԱՆ, 12 մայիսի – Sputnik. Վաղն առավոտյան ժամը 8-ից պետք է պարալիզացվի ամբողջ Երևանը` տոտալ գործադուլներով, դասադուլներով։ Հանրապետության հրապարակում այսօր «Տավուշը հանուն հայրենիքի» նախաձեռնության հանրահավաքին հայտարարեց Բագրատ սրբազան Գալստանյանը։
«Վաղն առավոտյան ես այցելելու եմ ստեղծագործական միություններ` գրողների, նկարիչների, Գիտությունների ակադեմիա, պատմության ինստիտուտ և այլ միություններ»,– հայտարարեց նա։
Նա նաև ասաց, որ այսպիսի հանրահավաքները կլինեն այն ժամանակ, երբ կլինեն դրանց անհրաժեշտությունը, սակայն ամեն օրվա ավարտին Սբ Աննա եկեղեցու բակում կհավաքվեն` օրը ամփոփելու համար։
Բագրատ սրբազանը հենց բեմի վրա ստացավ ծրար, որտեղ նշված էր, որ այս պահին Հայաստան–Վրաստան միջպետական ճանապարհի Բագրատաշեն հատվածը փակ է` ի աջակցություն այս շարժման։
Հիշեցնենք` «Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից երթով եկել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։
Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։