ԵՐԵՎԱՆ, 12 մայիսի – Sputnik. ՀՀ–ում բոլոր կուսակցություններն իրենց դրոշները մի կողմ են դրել ու հավաքվել են մեկ գաղափարի շուրջ` ունենալու արժանապատիվ հայրենիք։ Հանրապետության հրապարակում այսօր «Տավուշը հանուն հայրենիքի» նախաձեռնության հանրահավաքին հայտարարեց ՀՀ ԱԺ «Հայաստան» խմբակցության պատգամավոր Գառնիկ Դանիելյանը։
Նա նաև շնորհակալություն հայտնեց ազգային փոխրամասնություններին, որոնք միացել են շարժմանը։
«Բոլորը խառնվել են իրար` այս շարժումը հյուսիսի՞ց է, հարավի՞ց է, արևմուտքի՞ց է, արևելքի՞ց է։ Սա մաքուր հայկական, ազգային, սրտով, հոգով, էությամբ շարժում է, սպասարկում է մեր ազգային ու պետական շահերը։ Նրանք խառնվել են իրար, քանի որ այս շարժումը միավորել է տարբեր մարդկանց, քաղաքական հոսանքների մեկ նպատակի շուրջ` հայրենիք ու պատիվ ունենալու նպատակի շուրջ։ Մեր նպատակը մեկն է` ունենալ խաղաղ ու արժանապատիվ, ճշմարիտ Հայաստան»,– հայտարարեց նա։
Պատգամավորի խոսքով` շարժումը միավորելու է ներկաներին, անցյալին, երիտասարդներին ու տարեցներին։
«Մենք մեր տունը կարգի բերելու խնդիր ունենք, այդ ժամանակ էլ և՛ պատիվ, և՛ արժանապատվություն կունենանք և՛ հարևանների հետ համակեցություն»,– ընդգծեց Դանիելյանը։
Նա հայտարարեց, որ հպարտ է, որ բոլոր կուսակցություններն իրենց դրոշները մի կողմ են դրել ու հավաքվել են մեկ գաղափարի շուրջ. մեր առաջ այսօր խնդիր է դրված լինել Արևմտյան Ադրբեջա՞ն, թե Հայաստան։ «Մենք ընտրում ենք Հայաստանը»,– եզրափակեց իր խոսքը նա։
Հիշեցնենք` «Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից երթով եկել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։
Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։