ԵՐԵՎԱՆ, 25 ապրիլի – Sputnik. Քաղաքացիները փակել են Երևան–Գյումրի ճանապարհը, որն այլընտրանքային Հայաստան–Վրաստան մայրուղին է։
Նրանք վանկարկում են «Նիկոլ, դավաճան», «Նիկոլ, թուրք»։
«Զարմանալի ազգ ենք, ասում են` խաղաղություն լինի, չեմ ուզում։ Պետք ա պատերազմ լինի, առաջին զոհն էլ ես լինեմ, թե չէ սենց ուր կհասնենք։ Թուրքը մտել ու մտնում է մեր երկիր»,– նշում ր ճանապարհը փակած քաղաքացիներից մեկը։
Քաղաքացիների հետ է նաև ԱԺ «Հայաստան» խմբակցության պատգամավոր Մհեր Մելքոնյանը։
«Այսօր էլ փակել ենք Երևան–Գյումրի ճանապարհը և մեր բողոքի ձայնն ենք բարձրացնում երկրում տիրող իրավիճակի, իշխանությունների դավաճանական քաղաքականության արդյունքում տեղի ունեցող իրադարձությունների մասով։ Մեր զորակցությունն ենք հայտնում Տավուշի քույրերին և եղբայրներին»,– լրագրողների հետ զրույցում նշեց Մհեր Մելքոնյանը։
Նշենք, որ Հայաստան-Վրաստան միջպետական մյուս ճանապարհն արդեն 7-րդ օրն է շարունակում է փակ մնալ Տավուշի մարզի Կիրանց–Ոսկեպար հատվածում։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Ապրիլի 23-ին էլ ՀՀ վարչապետ Նիկոլ Փաշինյանը ֆեյսբուքյան էջում մի լուսանկար հրապարակեց` նշելով, որ Հայաստան-Ադրբեջան պետական սահմանի Տավուշ-Ղազախ հատվածում տեղադրվել է առաջին սահմանային սյունը։