ԵՐԵՎԱՆ, 20 ապրիլի – Sputnik. «Նեմեսիս» գործողության մասնակից, Հայոց ցեղասպանությունը վերապրած Սողոմոն Թեհլիրյանի ազգականներն այսօր արժեքավոր իրեր են հանձնել Հայոց ցեղասպանության թանգարան-ինստիտուտին։ Տեղեկությունը հայտնում է թանգարան–ինստիտուտի մամուլի ծառայությունը։
Թանգարան-ինստիտուտում հյուրընկալվել են Սողոմոն Թեհլիրյանի հորեղբոր որդու՝ Սամվելի թոռնուհիները` Արփի Օսկանյանը և Անուշ Օսկանյան-Օհանյանը։
Թանգարան-ինստիտուտում հյուրընկալվել են Սողոմոն Թեհլիրյանի հորեղբոր որդու՝ Սամվելի թոռնուհիները` Արփի Օսկանյանը և Անուշ Օսկանյան-Օհանյանը։
Նրանք իրենց ընտանեկան մասունքները` Սողոմոն Թեհլիրյանի անտիպ օրագրությունը և 9 լուսանկար, հանձնել են Հայոց ցեղասպանության թանգարանին: ՀՑԹԻ տնօրեն Էդիտա Գզոյանը հույս է հայտնել, որ դրանք, մասնավորապես օրագրությունը, նոր լույս կսփռեն ինչպես Սողոմոն Թեհլիրյանի կյանքի, այնպես էլ hայոց պատմության հերոսական էջերից «Նեմեսիս» գործողության առանձին դրվագների վրա:
Գզոյանը կարևորել է նաև Սողոմոն Թեհլիրյանի դատավարության նշանակությունը ցեղասպանության եզրույթի և կոնվենցիայի ստեղծման հարցում։
«Սողոմոն Թեհլիրյանը մերն է, բայց նա նաև աշխարհինն է»,– նշել է նա։
ՀՑԹԻ գլխավոր ֆոնդապահ Գոհար Խանումյանն էլ ներկայացրել է Հայաստանի տարբեր թանգարաններում և արխիվներում, այդ թվում նաև Սողոմոն Թեհլիրյանի` Հայոց ցեղասպանության թանգարան-ինստիտուտում պահվող լուսանկարները, անձնական փաստաթղթերը և այլն:
Ի նշան երախտագիտության` Էդիտա Գզոյանը նվիրատուներին հանձնել է ապրիլքսանչորսյան ծաղկաթերթերից պատրաստված շնորհակալագրեր: