ԵՐԵՎԱՆ, 19 ապրիլի – Sputnik. Երևանի համայնքային 100 մանկապարտեզներում արդեն գործում է եկարօրյա ծառայությունը, որը վճարովի է` ամսական 5000 դրամ։ Տեղեկությունը հայտնում է Երևանի քաղաքապետարանը։
Նշենք, որ Երևանի քաղաքապետարանի ենթակայությամբ գործում է 162 նախադպրոցական ուսումնական հաստատություն։
Երևանի քաղաքապետարանի հանրակրթության վարչության պետ Մարգարիտ Խաչատրյանը նշել է, որ բոլոր մանկապարտեզներում հնարավորություն կա ներդնելու երկարօրյա վճարովի ծառայությունը։ Այն գործում է, նույնիսկ եթե արտաժամյա մնա միայն 1 երեխա։
«Մանկապարտեզներում կան նաև կրթական լրացուցիչ վճարովի ծառայություններ։ Հիմնականում պարի, օտար լեզուների, կերպարվեստի ու դեկորատիվ արվեստի խմբակներն են։ Գումարը մանկավարժին տրամադրվող լրացուցիչ վարձատրության համար է»։
Հիշեցնենք, որ ապրիլի 1-ից Երևանի քաղաքապետարանի ենթակայությամբ գործող մանկապարտեզների դայակների, դաստիարակների և տնօրենների աշխատավարձերը 10-31 տոկոսով բարձրացել են։ Բարձրացվել է նաև սպասարկող ամբողջ անձնակազմի՝ խոհարարից մինչև բուժքրոջ աշխատավարձը։
Մանկապարտեզում աշխատող մանկավարժները հնարավորություն ունեն հավելավճար ստանալ նաև տարակարգի միջոցով։ Տարակարգ ստանալու համար կարող են դիմել բոլոր այն մանկավարժները, որոնք արդեն մասնակցել են վերապատրաստումներին: