Ֆինլանդիայի նախագահը ՆԱՏՕ-ին կոչ է արել պատրաստվել ՌԴ-ի հետ հակամարտությանը

ԵՐԵՎԱՆ, 11 ապրիլի – Sputnik. Ֆինլանդիայի նախագահ Ալեքսանդր Ստուբը Financial Times պարբերականին տված հարցազրույցում Հյուսիսատլանտյան դաշինքին կոչ է արել նախապատրաստվել ՌԴ-ի հետ հնարավոր հակամարտությանը։ Տեղեկությունը հայտնում է ՌԻԱ Նովոստին:

Նա նշել է, որ ՆԱՏՕ-ի երկրների առաջնորդները պետք է իրենց բանակները պատրաստեն հնարավորին, այլ ոչ թե ռազմատենչ հռետորաբանությամբ խոսեն ՌԴ-ի դեմ: Ստուբը կարծում է, որ վերջերս հնչած «Ռուսաստանի սպառնալիքների» մասին հրապարակային նախազգուշացումները շեղում են Եվրոպայի պետությունների ուշադրությունը Կիևի ռեժիմին օգնելուց և իրենց զինվորականներին պատրաստելուց:

Այնուամենայնիվ, Ֆինլանդիայի նախագահը չի կարծում, որ Ռուսաստանը մինչև 2030 թվականը հակամարտություն կսկսի դաշինքի պետություններից մեկի հետ:

Նրա խոսքով՝ Եվրոպայի երկրները պետք է ավելի պատրաստված լինեն։ Նա նաև կոչ է արել պատրաստվել իրավիճակի զարգացման վատագույն սցենարին՝ դրանից խուսափելու համար։

Ստուբը նաև կարծում է, որ անհրաժեշտ է աջակցել Կիևի ռեժիմին «ինչ էլ որ դա արժենա»: Նրա խոսքով՝ Ֆինլանդիայում այդ օգնության համար դատարկում են զինամթերքի «սեփական պահեստարանները», դրանք ավելի ուշ կհամալրեն:

Ֆինլանդիայի նախագահը նաև հայտարարել է, որ երկրին չեն անհանգստացնում Ֆինլանդիայի սահմանների երկայնքով իր ներկայությունն ավելացնելու` Մոսկվայի ծրագրերը:

«Մենք չենք անհանգստանում այս ամենի համար, բայց պատրաստ ենք», - նշել է նա:

Վերջին շրջանում ավելի հաճախ կարելի է լսել եվրոպացի պաշտոնյաների և նախագահների խոսքերը Ռուսաստանի հետ հնարավոր հակամարտության մասին։ Ավելի վաղ Ֆինլանդիայի արտգործնախարար Էլինա Վալտոնենը չէր բացառել ապագայում արևմտյան զորքեր Ուկրաինա ուղարկելը, սակայն նա կարծում է, որ այս պահին նման անհրաժեշտություն չկա:

ՌԴ ԱԳՆ պաշտոնական ներկայացուցիչ Մարիա Զախարովան իր հերթին հայտարարել է, որ Ռուսաստանը չի պատրաստվում քաղաքավարության կանոններ պահպանել նրանց հետ, ովքեր հովանավորում են «Կիևի ռեժիմի ամենաթողությունը»։