Թուրքիայի ոստիկանությունը սկսել է ջրցաններ կիրառել Վանի նահանգում ցուցարարներին ցրելու համար։ Դատելով թուրքական լրատվամիջոցների հրապարակած կադրերից՝ ուժայինները ցուցարարների դեմ նաև արցունքաբեր գազ են կիրառում։
Վանի բնակիչները դուրս են եկել փողոց՝ չնայած ցույցեր անցկացնելու արգելքին։ Նրանք պահանջում են վերականգնել DEM (Ժողովրդական հավասարության և ժողովրդավարության կուսակցություն) քրդամետ կուսակցությունից քաղաքապետ ընտրված Աբդուլլա Զեյդանի մանդատը։
Նշենք, որ մարտի 31-ին Թուրքիայում կայացած տեղական ինքնակառավարման մարմինների ընտրությունների արդյունքներով Վանի քաղաքապետ է դարձել Աբդուլլա Զեյդանը։ Բայց նահանգի ընտրական հանձնաժողովը չեղարկել է Զեյդանի մանդատը, քանի որ նրան մեղադրում են Քրդստանի բանվորական կուսակցության հետ կապերի մեջ։