ԵՐԵՎԱՆ, 29 մարտի – Sputnik. Աբու-Դաբի–Երևան չվերթով «Զվարթնոց» օդանավակայան ՀՀ ժամանած քաղաքացին ենթարկվել է մաքսային հսկողության և նրա ուղեբեռից հայտնաբերվել է 40 «Аpple» մոդելի բջջային հեռախոս։ Տեղեկությունը հայտնում է ՀՀ պետական եկամուտների կոմիտեի մամուլի ծառայությունը։
«Աբու-Դաբի-Երևան չվերթով ՀՀ ժամանած քաղաքացին ՊԵԿ Էլեկտրոնային առևտրի և օդային տրանսպորտով իրականացվող փոխադրումների վարչության ուղևորների մաքսային հսկողության բաժնում հատել է «Կանաչ ուղի» մուտքի գիծը, որը համարվում է մաքսային հայտարարագրման ենթակա ապրանքների բացակայության մասին ֆիզիկական անձի կողմից արված հայտարարություն»,– նշված է հաղորդագրության մեջ։
Նշվում է, որ ՊԵԿ ներքին անվտանգության վարչության և մաքսանենգության դեմ պայքարի վարչության «Զվարթնոց» բաժնի մաքսային ծառայողները քաղաքացուն ուղեկցել են «Կարմիր ուղի» մաքսային հսկողության գոտի:
Կազմվել է մաքսային զննման ակտ և մաքսային կանոնների խախտման վերաբերյալ արձանագրություն։
Վարչական վարույթի հետագա ընթացքն ապահովելու համար նյութերն ուղարկվել են ՊԵԿ Իրավաբանական վարչություն։