ԵՐԵՎԱՆ, 4 մարտի – Sputnik. ՀՀ զինված ուժերի գլխավոր շտաբի պետի նախկին տեղակալ Տիրան Խաչատրյանը գոհ է կալանքից ազատ արձակվելու որոշումից։ Նա այդ մասին ասաց Կոտայքի մարզի ընդհանուր իրավասության դատարանի մոտ` պատասխանելով լրագրողների հարցերին։
Նշենք, որ քիչ առաջ դատարանն ազատ արձակեց Տիրան Խաչատրյանին և որպես խափանման միջոց ընտրեց 5 մլն դրամ գրավն ու բացակայելու արգելքը։
«Սա դեռ վերջնական չէ, բայց միջանկյալ հատվածի համար այս որոշումից գոհ եմ։ Այն, ինչ տեղի է ունեցել, ու իմ սպասելիքը, որ հենց այսպիսի որոշում պետք է լիներ, այդքան էլ սա չէր։ Դեռ դատաքննություն է ընթանալու, մանրամասներ չեմ կարող հայտնել, բայց ցուցմունքներում էլ ասել եմ` ինձ մեղավոր չեմ ճանաչում։ Ես բնույթով, բնավորությամբ և էությամբ այդպիսի մարդ չեմ, որ ինձ նման արարք թույլ տամ»,– ասաց Խաչատրյանը։
Լրագրողների դիտարկմանը, որ կրակոց է հնչել, 1 անձ վիրավորվել է, գեներալ–լեյտենանտը պատասխանեց` հետագայում ամեն ինչ կպարզվի, թե այդ կրակոցն ինչ հանգամանքներում է տեղի ունեցել, և ինչպես է այդ անձը վիրավորում ստացել։ ՀՀ ԶՈւ ԳՇ պետի նախկին տեղակալը վստահեցրեց` ինքը որևէ մեկին վնասելու, առավել ևս վիրավորելու փորձ չի արել, չնայած որ շատ ավելի վատ բաներ անելու հնարավորություն է ունեցել։
Խաչատրյանը դեռ նախաքննության ժամանակ կողմնակալ մոտեցում է նկատել իր նկատմամբ։ Նա հակված է մտածել, որ դա դա կապված է իր քաղաքական դիրքորոշման հետ։
Հիշեցնենք` հունվարի 12-ին հայտնի դարձավ, որ Կոտայքի մարզում` «Էրիկի մոտ» հացատանը, խնջույքի ընթացքում վիճաբանություն է եղել մոտ 10 անձի միջև։ Ըստ ՔԿ–ի` վիճաբանության ընթացքում Տիրան Խաչատրյանն ատրճանակից օդ է կրակել, իսկ երբ ներկաները ցանկացել են կանգնեցնել նրան և ձեռքից վերցնել ատրճանակը, արձակել է ևս մեկ կրակոց, ինչի հետևանքով հրազենային վիրավորում է ստացել հացատան մեկ այլ առանձնասրահից դուրս եկած հաճախորդներից մեկը։
2024թ. հունվարի 13-ին Տիրան Խաչատրյանին մեղադրանք ներկայացվեց ՀՀ քրեական օրենսգրքի 297-րդ հոդվածի (զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ կամ դրա գործադրման սպառնալիքով կատարված խուլիգանությունը) 3-րդ մասով նախատեսված հանցավոր արարք կատարելու համար։ Նրա նկատմամբ խափանման միջոց ընտրվեց կալանքը։
Այս գործով ևս 3 անձ կա կալանավորված։