Սոչիում հանդիսավորությամբ բացվեց Երիտասարդության համաշխարհային փառատոնը, որը համախմբել է ավելի քան 20 հազար երիտասարդ առաջնորդների Եվրոպայի, Ասիայի, Աֆրիկայի, Հյուսիսային և Կենտրոնական Ամերիկայի, Մերձավոր Արևելքի երկրներից:
Ամենամեծ արտասահմանյան խումբը` 630 մարդ, մարտի 1-ին գնացքով եկել է Բելառուսից։ Հայաստանից 220 մարդ է մեկնել փառատոնին։
Երիտասարդության համաշխարհային փառատոնի պաշտոնական մեկնարկը տվեց ՌԴ նախագահ Վլադիմիր Պուտինը: Երկրի ղեկավարի՝ մասնակիցներին ուղղված տեսաուղերձը ցուցադրվեց «Բոլշոյ» սպորտի պալատում։
«Ուրախությամբ ողջունում եմ Երիտասարդության համաշխարհային փառատոնի մասնակիցներին և հյուրերին, տարբեր երկրների և ժողովուրդների բանագնացներին, որոնց այստեղ՝ Սոչիում, միավորել է Ռուսաստանը։ Այս հարթակումհավաքվել են գրեթե 300 տարբեր ժողովուրդների ներկայացուցիչներ», - նշեց Պուտինը։
Պետության ղեկավարի խոսքով՝ Ռուսաստանում բազմազգ միասնությունը մեծագույն արժեք է, որը սահմանում է այն սկզբունքները, որոնցով այսօր ապրում, զարգանում են պետությունն ու հասարակությունը:
«Մենք հավատում ենք երիտասարդությանը և Ռուսաստանը կառուցում որպես երիտասարդության հնարավորությունների երկիր։ Մենք միշտ բաց ենք երկխոսության համար», - ավելացրեց ՌԴ նախագահն ու Երիտասարդության համաշխարհային փառատոնը հայտարարեց բացված։
Միջոցառման մասնակիցների համար պատրաստվել է հագեցած կրթական և մշակութային ծրագիր, որի նպատակն է երկխոսություն հաստատել կարևոր թեմաների շուրջ։
Փառատոնը սկսվեց դիտարժան արարողությամբ, որը պատմում էր սիրո, հասունացման և կարևոր ընտրության մասին: Բացի լուրջ բաժիններից և թեմաներից, մասնակիցներին սպասում են նաև բազմաթիվ ժամանցային միջոցառումներ՝ մրցույթներ, սառցե շոուներ և համերգներ։
Փառատոնը, որն անցկացվում է «Սիրիուս» դաշնային տարածքի հարթակներում, կշարունակվի մինչև մարտի 7-ը: