Չնայած կյանքում տեսած դժվարություններին` հայ մեծանուն նկարիչ Մարտիրոս Սարյանը վառ գույներով էր պատկերում կյանքը` գրեթե բացառելով սև գույնը։ Նրա տուն-թանգարանի գլխավոր ֆոնդապահ, Սարյանի թոռնուհի Սոֆյա Սարյանը նկարչի ծննդյան օրվա առթիվ Sputnik Արմենիայի հետ զրույցում պատմել է պապի մասին։
«Սարյանը սևը չէր սիրում։ Տեսնելով մահն ու ողբերգությունը` նա ծաղիկներ էր պատկերում և մտածում էր, որ արվեստը մեծ ուժ է, որը պետք է օգնի մարդկանց պայքարել, ապրել ու ստեղծագործել։ Նա վստահ էր, որ միայն կյանքով է հնարավոր հաղթել մահը»,– ասում է Սոֆյա Սարյանը։
Նկարչի կենսագրության մեջ նշված է, որ նա ծնվել է փետրվարի 28-ին, իսկ փակագծերում 16 թիվն է նշված, մինչդեռ նա իր ծննդյան օրը համարում էր փետրվարի 29-ը։
Թոռնուհին բացատրում է այս «խառնաշփոթը». «Նա ծնվել է հին տոմարով փետրվարի 16-ին, դա նոր տոմարով փետրվարի 29-ն է։ Բայց որպեսզի տոնենք ամեն տարի, մենք նշում ենք փետրվարի 28-ին։ Սարյանը 4 տարին մեկ էր ծնունդը նշում ու կատակում, որ հենց դա է իր երկարակեցության գաղտնիքը` 4 տարին մեկ մեծանալը (նկարիչն ապրել է 92 տարի. խմբ)։ Բայց դրա հետ մեկտեղ, երբ այդ օրը գալիս էին նրան շնորհավորելու, ասում էր` իմ ծնունդը ամեն օր է, ես ծնվում եմ ամեն նոր օրվա հետ»։
Սոֆյա Սարյանը խոսում է պապի համեստության ու հայրենասիրության մասին և հիշում մի դեպք։ ԽՍՀՄ նախարարների խորհրդի նախագահ Ալեքսեյ Կոսիգինը Սարյանից նվեր է ստանում Արարատը պատկերող մի նկար ու հարցնում` փոխարենը ի՞նչ կարող եմ անել։
«Ես նվիրում եմ Ձեզ նկարը, Դուք կկարողանա՞ք վերադարձնել իմ ժողովրդին բնօրինակը», - պատասխանում է Սարյանը։
Սոֆյա Սարյանն անդրադառնում է նաև թանգարանի ֆոնդի համալրմանն ու Սարյանի հերթական տարեդարձին նվիրված միջոցառումներին։
Ամբողջական զրույցը` տեսանյութում։