Ֆրանսիայի կառավարության քաղաքականությունից դժգոհ ֆերմերները ճեղքել են ոստիկանների շղթան և ներխուժել ցուցասրահ, որպեսզի սուլեն երկրի նախագահ Էմանուել Մակրոնին։ Տեղեկությունը հայտնում է ՌԻԱ Նովոստին։
Թեև մուտքի մոտ իրավապահներ են եղել, բայց մի քանի հարյուր հոգու հաջողվել է ներս մտնել։
Վեճ է սկսվել անվտանգության աշխատակիցների և ցուցարարների միջև։ Ոստիկանությունը սկսել է նրանց դուրս հանել շենքից։
Մակրոնն այդ պահին երկրորդ հարկում է եղել։ Ֆերմերների և արհմիությունների մի մասը պատրաստ է հանդիպել նախագահի հետ, բայց շատերը դեմ են, որ նա ներկա լինի գյուղատնտեսական ցուցահանդեսին, քանի որ, ըստ նրանց, իշխանությունները ֆերմերների համար բավարար ջանքեր չեն գործադրել։
Էքսպոկենտրոնի մոտ ոստիկանության հատուկ ուժեր են բերվել։
Վերջին շաբաթներին ֆերմերները պարբերաբար ցույցեր են կազմակերպում Ֆրանսիայում։ Նրանք տրակտորներով, խոտի դեզերով և գոմաղբի կույտերով փակում են մայրուղիները, գոմաղբ և թափոններ նետում վարչական շենքերի ուղղությամբ։ Ֆերմերները պահանջում են ընդունել իրենց գործունեության կարևորությունը և քննադատում գյուղատնտեսության ոլորտում կառավարության քաղաքականությունը, ինչը, ըստ նրանց, անմրցունակ է դարձնում իրենց։
Նրանք դեմ են գյուղատնտեսական արտադրանքի ներմուծմանը, ոռոգման համար ջրի օգտագործման սահմանափակումներին, դիզվառելիքի գնի բարձրացմանը, ինչպես նաև շրջակա միջավայրի պաշտպանությանն ուղղված սահմանափակող միջոցառումներին և արտադրության վրա ֆինանսական ծանրաբեռնվածության աճին։