ԵՐԵՎԱՆ, 13 փետրվարի – Sputnik. Երևանի ավագանու «Հանրային ձայն» խմբակցության անդամներ Անուշ Խուդավերդյանը և Անուշ Գինոսյանը դուրս են եկել «Հանրային ձայն» խմբակցության կազմից, բայց պահպանել են ավագանու անդամի իրենց լիազորությունները։ Այս մասին Երևանի ավագանու նիստում հայտարարեց քաղաքապետ Տիգրան Ավինյանը։
Նա ընդգծեց, որ ԿԸՀ–ն արդեն արձանագրել է փաստը։
Հիշեցնենք` փետրվարի 7-ին Երևանի ավագանու արտահերթ նիստի օրակարգում ներառված էր ավագանու անդամներից 5-ի լիազորությունները վաղաժամկետ դադարեցնելու հարցը։ «Մայր Հայաստան» խմբակցության անդամներ Սոնա Աղեկյանի, Նարինե Հայրապետյանի և «Ազգային առաջընթաց» խմբակցության անդամ Հայկ Մարությանի լիազորությունները դադարեցվեցին, բայց քանի որ բավարար չափով քվե չհավաքվեց, ավագանին չկարողացավ մանդատից զրկել նաև «Մայր Հայաստան» խմբակցության անդամներ Գևորգ Ստեփանյանին ու Զարուհի Փոստանջյանին։
ՀՀ կենտրոնական ընտրական հանձնաժողովը Երևանի ավագանու թափուր մնացած 3 մանդատները տրամադրել է «Մայր Հայաստան» կուսակցությունների դաշինքի և «Ազգային առաջընթաց» կուսակցության ներկայացուցիչներին։
Մասնավորապես Երևանի ավագանու անդամի մանդատներ են տրվել «Մայր Հայաստան» կուսակցությունների դաշինքից Արմենակ Դանիելյանին և Սուսաննա Մելիքյանին, իսկ «Ազգային առաջընթաց» կուսակցության թափուր մանդատը փոխանցվել է Արամ Մանուկյանին։