Հովիկ Աղազարյանին ապտակելու համար կալանավորված տղամարդն ազատ կարձակվի

ԵՐԵՎԱՆ, 17 նոյեմբերի – Sputnik․ ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանին ապտակելու համար կալանավորված Արմեն Գալստյանն ազատ կարձակվի։ Տեղեկությունը հայտնում է «Որդիների կանչ» ՀԿ-ն։

Արմեն Գալստյանն ազատ կարձակվի նոյեմբերի 21-ին։

ՀԿ-ից նաև տեղեկացնում են, որ նիստը հետաձգվել է, քանի որ Հովիկ Աղազարյանը նիստին չի ներկայացել։

Հիշեցնենք` 44–օրյա պատերազմում զոհվածների ծնողները սեպտեմբերի 21-ին ՔՊ–ական պատգամավորներին թույլ չէին տվել մտնել Եռաբլուր։ Չնայած նրան, որ ոստիկանները փորձել էին իրավիճակը կարգավորել, զոհվածների հարազատներից մեկը հարվածել էր Հովիկ Աղազարյանի դեմքին։

Ավելի ուշ ՀՀ քննչական կոմիտեն հայտնեց, որ պատգամավորին հարվածած տղամարդը ձերբակալվել է։ Քրեական վարույթ է նախաձեռնվել ՀՀ քրեական օրենսգրքի 195-րդ հոդվածի 2-րդ մասի 1-ին և 5-րդ կետերով (մի խումբ անձանց կողմից ֆիզիկական ներգործությունը անձի նկատմամբ` կապված այդ անձի կողմից իր պետական, քաղաքական, ծառայողական, մասնագիտական կամ հասարակական գործունեության կամ պարտքի կատարման հետ) և 297-րդ հոդվածի 2-րդ մասի 1-ին կետով (խուլիգանությունը, որ կատարվել է մի խումբ անձանց կողմից)։

Սեպտեմբերի 24–ին Արմեն Գալստյանը 2 ամսով կալանավորվեց։