ԵՐԵՎԱՆ, 13 նոյեմբերի – Sputnik. Դատախազությունը պահանջում է ՀՀ երրորդ նախագահ Սերժ Սարգսյանից բռնագանձել մոտ կես միլիարդ դրամ։ Դատական նիստից հետո տեղեկությունը հայտնեց Սերժ Սարգսյանի փաստաբանական խմբի անդամ Ռուբեն Հակոբյանը` պատասխանելով լրագրողների հարցերին։
«Այսօրվա դատական նիստի ընթացքում գործով մեղադրող դատախազները հայցադիմում ներկայացրին։ Նրանք մեղադրանքում առաջադրված գումարի չափով քաղաքացիական հայց ներկայացրին՝ գումարի բռնագանձման պահանջով»,– ասաց փաստաբանը։
Նա նշեց, որ Սարգսյանի պաշտպանական կողմը 14 օր ժամանակ է խնդրել։
«Այդ ժամկետը խնդրեցինք, որպեսզի ծանոթանանք և պատճառաբանված առարկությունները ներկայացնենք, թեև ի սկզբանե հայտարարել ենք, որ ամբողջությամբ չենք ընդունում հայցադիմումը»,– ընդգծեց Հակոբյանը։
Նրա խոսքով` դատական հաջորդ նիստում փաստաբանական թիմը հիմնավորումներ ու պատճառաբանություններ կներկայացնի։
Հիշեցնենք` ըստ Սերժ Սարգսյանին առաջադրված մեղադրանքի` վերջինիս կազմակերպմամբ և «Ֆլեշ» ընկերության սեփականատեր Բարսեղ Բեգլարյանի դրդմամբ 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 դրամ:
Սերժ Սարգսյանին մեղադրանք է առաջադրվել ՀՀ ՔՕ 38-179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացում կամ վատնում։
Երրորդ նախագահն իրեն առաջադրված մեղադրանքը չի ընդունում։
Նշենք, որ գործով ամբաստանյալ էին նաև գյուղատնտեսության նախկին նախարար Սերգո Կարապետյանը և գյուղատնտեսության նախարարի տեղակալ Սամվել Գալստյանը։ Երկուսն էլ մահացել են կորոնավիրուսից։ Դատարանի որոշմամբ` նրանց նկատմամբ քրեական հետապնդումը դադարեցվել է։