ԵՐԵՎԱՆ, 11 հոկտեմբերի – Sputnik. Գիշերը հրդեհ է բռնկվել Գեղարքունիքի մարզի Զոլաքար գյուղում։ Կա մեկ զոհ, մեկ տուժած։ Տեղեկությունը հայտնում է ՀՀ ՆԳՆ Փրկարար ծառայությունը։
Հաղորդագրության համաձայն` հոկտեմբերի 11-ին, ժամը 04։36-ին Գեղարքունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Զոլաքար գյուղում այրվում է անասնագոմ։
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ:
«Մինչ փրկարարների կանչի վայր հասնելը տեղի ուժերով բժշկական կենտրոն են տեղափոխվել տուժածներ Ա․ Ս․-ն (ծնված 1995 թ) և Ն․ Ա․-ն (ծնված 1962 թ․), որտեղ արձանագրվել է վերջինիս մահը»,–նշվում է հաղորդագրության մեջ։
Հրդեհը մեկուսացվել է ժամը 05։14-ին, մարվել՝ 08։25-ին։ Այրվել են տանը հարակից անասնագոմի (ընդհանուր մոտ 160 քմ) տանիքի փայտե կառուցատարրերը (մոտ 136 քմ)։