ԵՐԵՎԱՆ, 2 սեպտեմբերի–Sputnik. Արցախի Անկախության օրվա առիթով շնորհավորական ուղերձներ են հղել ՀՀ երկրորդ և երրորդ նախագահները։ Ռոբերտ Քոչարյանն ու Սերժ Սարգսյանն իրենց ուղերձներում անդրադարձել են այն ծանր իրավիճակին, որում այսօր Արցախն է, և խոսել անկախության պահպանման կենսական անհրաժեշտության մասին։
«Այսօր, ինչպես 32 տարի առաջ, կրկին այն հանգրվանին ենք, երբ ողջ հայության ամուր կամքն ու մեկ նպատակի շուրջ համախմբվածությունն է միակ ճանապարհը, որը կպահպանի Արցախի անկախությունը»,– Ֆեյսբուքյան իր պաշտոնական էջում գրել է ՀՀ երկրորդ նախագահ Ռոբերտ Քոչարյանը։
ՀՀ երրորդ նախագահ Սերժ Սարգսյանը վստահ է, որ ստեղծված իրավիճակից ելքն առաջին հերթին «ապազգային իշխանություններին հեռացնելն է»։ Նա շեշտել է` իրավիճակը չափազանց ծանր է, բայց ոչ անհուսալի։ Հայ ժողովրդի միասնական ջանքերով հնարավոր է հայրենիքի արժանապատիվ պաշտպանություն՝ զուգահեռ պատշաճ աշխատանք իրականացնելով դիվանագիտական ճակատում:
«Անկախության պայքարի ճանապարհին անտարբերությունը, հուսահատությունը, հարմարվողականությունն ու թուլամորթությունը չեն կարող ընկեր լինել»,–իր Ֆեյսբուքյան էջում գրել է ՀՀ երրորդ նախագահ Սերժ Սարգսյանը:
Նա հավելել է, որ պետք է ապավինել վճռականությանը, արիությանը, կամքին ու պատվախնդրությանը։
Հիշեցնենք` 1991 թվականի սեպտեմբերի 2-ին ժողովրդական պատգամավորների Լեռնային Ղարաբաղի մարզային և Շահումյանի շրջանային խորհուրդների համատեղ նստաշրջանը հռչակեց Լեռնային Ղարաբաղի Հանրապետությունը (ԼՂՀ) նախկին ԼՂԻՄ և Շահումյանի շրջանի սահմաններում:
Հավելենք, որ 1992-ին հատուկ որոշումով Հայաստանի խորհրդարանը Հայաստանի Հանրապետության համար անընդունելի է «համարել միջազգային կամ ներպետական ցանկացած փաստաթուղթ, որտեղ Լեռնային Ղարաբաղի Հանրապետությունը նշված կլինի Ադրբեջանի կազմում։