ԵՐԵՎԱՆ, 27 հուլիսի – Sputnik. 2020թ. Նոյեմբերի 9-ի եռակողմ հայտարարությամբ սահմանում է նաև փախստականների վերադարձ Լեռնային Ղարաբաղի տարածք և հարակից շրջաններ, ինչը մինչ օրս չի իրականացվել Ադրբեջանի կողմից։ Այս մասին ասված է ՀՀ ԱԳ նախարար Արարատ Միրզոյանի` լրատվամիջոցների կողմից ուղղված հարցերից մեկի պատասխանում։
Հարցը վերաբերում էր Հայաստանի, Ռուսաստանի և Ադրբեջանի արտգործնախարարների՝ Մոսկվայում կայացած եռակողմ բանակցություններից հետո ՌԴ ԱԳ նախարար Սերգեյ Լավրովի խոսքերին, որոնցից ենթադրվում էր, որ ԼՂ հայերի իրավունքների թեման բանակցությունների ընթացքում կապվել է Հայաստանում ազգային փոքրամասնությունների իրավունքների պաշտպանության թեմային։
Ըստ Միրզոյանի` խոսքն այստեղ վերաբերում է, այդ թվում՝ Հադրութի, Շուշիի, Մարտակերտի, Ասկերանի, Շահումյանի, Գետաշենի շրջաններին:
«Իհարկե, հայկական կողմն արձանագրում է նաև դեռևս 1988-1991 թթ. Ադրբեջանի տարբեր բնակավայրերից, մասնավորապես Բաքվից, Կիրովաբադից, Սումգայիթից և այլ վայրերից, մինչ այդ նաև Նախիջևանի Ինքնավար Հանրապետությունից բռնի տեղահանված հայերի իրավունքները, նրանց կողմից բարձրաձայնվող խնդիրները»,– նշել է ԱԳ նախարարը։
Այնուամենայնիվ, ըստ նրա, Լեռնային Ղարաբաղի հայերի՝ տեղի բնիկ ժողովրդի իրավունքների և անվտանգության ապահովման խնդիրն իր խորքային բովանդակությամբ ամբողջապես տարբերվող և որևէ զուգահեռ չունեցող հիմնահարց է։
Ըստ նախարարի` այն որևէ կերպ չի կարող փոխկապակցվածություն ունենալ այլ, այդ թվում ՀՀ–ում «բնակվող քաղաքացիների» (ՌԴ արտգործնախարարի բառերով)՝ միջազգային պարտավորություններով նախատեսված և ՀՀ կողմից լիարժեքորեն ապահովվող իրավունքների թեմայի հետ։
Ըստ այդմ, Արարատ Միրզոյանի խոսքով, մոսկովյան վերջին եռակողմ հանդիպման ընթացքում այս տրամաբանությունից դուրս քննարկում և առավել ևս համաձայնություն չի եղել:
Հիշեցնենք, որ հուլիսի 25–ին Մոսկվայում Հայաստանի և Ադրբեջանի ԱԳ նախարարներ Արարատ Միրզոյանի և Ջեյհուն Բայրամովի հետ եռակողմ բանակցություններից հետո ՌԴ ԱԳ նախարար Սերգեյ Լավրովը հայտարարել է, որ ադրբեջանական կողմը փոխադարձ հիմունքներով պատրաստ է երաշխիքներ տրամադրել իր տարածքում բնակվող անձանց: Հայերը պատրաստ են նույնը անել Հայաստանի Հանրապետությունում բնակվող քաղաքացիների նկատմամբ բոլոր կոնվենցիաների կիրառման առումով։