ԵՐԵՎԱՆ, 17 հուլիսի - Sputnik. Արցախի Հանրապետության ընդհանուր իրավասության առաջին ատյանի դատարանը մերժեց Արցախի հերոս, Արցախի անվտանգության խորհրդի նախկին քարտուղար Վիտալի Բալասանյանին կալանավորելու քննիչի միջնորդությունը։ Բալասանյանը կմնա ազատության մեջ։ Տեղեկությունը Sputnik Արմենիային հայտնեց պաշտպան Ռաֆայել Մարտիրոսյանը։
Փաստաբանի խոսքով` Վիտալի Բալասանյանը առողջական խնդիրներ դեռ ունի։Դատական նիստից հետո նա վերադառնալու է հիվանդանոց` ստացիոնար բուժումը շարունակելու։
Այսօր, ավելի վաղ Վիտալի Բալասանյանին կալանավորելու միջնորդություն էր ներկայացվել դատարան։
Հիշեցնենք` Վիտալի Բալասանյանին, նրա որդուն և քեռորդուն ձերբակալել են հուլիսի 13-ին Արցախում: Ըստ տեղեկությունների` գեներալին ձերբակալել են Ասկերանի իր տանը։ Մինչ այդ 40 րոպե խուզարկություն են իրականացրել Բալասանյանի տանը։
Բալասանյանի նկատմամբ հարուցվել է քրեական գործ Արցախի Հանրապետության Քրեական օրենսգրքի 337 հոդվածի 1-ին մասի կասկածանքով (իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ։
Հուլիսի 14–ին Բալասանյանի առողջական վիճակը վատացել էր. նրան տեղափոխել էին Արցախի Հանրապետական հիվանդանոց։