«Վագներ» մասնավոր ռազմական կազմակերպության կողմից Ռուսաստանում ռազմական ապստամբության փորձը հարված է թիկունքից։ Այս մասին ՌԴ բնակչությանն ուղղված իր խոսքում ասաց ՌԴ նախագահ Վլադիմիր Պուտինը։
«Այն գործողությունները, որոնք աղճատում են մեր միասնությունը, դա փաստացի հետ կանգնել է սեփական ժողովրդից, զինակից ընկերներից, որոնք այս պահին պայքարում են մարտի դաշտում։ Սա թիկունքից հարված է մեր երկրին ու ժողովրդին ։ Հենց այսպիսի հարված հասցվել էր Ռուսաստանին 1917 թվականին, երբ երկիրն առաջին հայրենական պատերազմն էր վարում։ Այդ ժամանակ էլ ռուսները սպանում էին ռուսներին, եղբայրները` եղբայրներին։ Նրանք, ովքեր կազմակերպել և նախապատրաստել են ռազմական ապստամբությունը, դավաճանել են Ռուսաստանին և պատասխան են տալու դրա համար»,– ասաց Պուտինը։
Շարունակելով առաջին համաշխարհային պատերազմում ռուսների մասնակցության թեման` նա շեշտեց, որ իրենք ունեցել են նաև հերոսներ, որոնք ազատագրել են Սոլեդարը և Արտյոմովսկը, Դոնբասի քաղաքներն ու գյուղերը, պայքարել և իրենց կյանքը տվել Նովոռոսիայի, ռուսական աշխարհի միասնության համար։
«Նրանց անվանն ու փառքին նույնպես դավաճանել են նրանք, ովքեր փորձում են խռովություն կազմակերպել, երկիրը մղում են դեպի անարխիա և եղբայրասպանություն, դեպի պարտություն, ի վերջո` դեպի կապիտուլյացիա»,– ընդգծեց Պուտինը։
Նա ընդգծեց, որ ՌԴ–ն ծանր պայքար է մղում իր ապագայի համար, Արևմուտքի ողջ ռազմական և տեղեկատվական մեքենան ուղղված է Ռուսաստանի դեմ։ Հատուկ գործողության ընթացքում պետք է վերացնել ցանկացած ներքին կռիվ, քանի որ այժմ որոշվում է ժողովրդի ճակատագիրը։
Պուտինը նշեց, որ բոլոր այն անձինք, որոնք գիտակցաբար բռնել են դավաճանության ճանապարհը` զինված ապստամբություն են պատրաստել, բռնել են շանտաժի և ահաբեկչական մեթոդների ճանապարհը, անխուսափելիորեն պատիժ են կրելու` պատասխան տալով օրենքի և ժողովրդի առաջ։
Հիշեցնենք` ավելի վաղ սոցցանցերում Եվգենի Պրիգոժինի անունից տեղեկություն էր տարածվել այն մասին, որ իբր ՌԴ ՊՆ–ն հրթիռա–ռումբային հարվածներ է հասցրել «Վագներ» ՄՌԿ–ի թիկունքային ստորաբաժանումներին։ ՌԴ ՊՆ–ն հայտարարել էր, որ այդ տեղեկություններն իրականությանը չեն համապատասխանում և տեղեկատվական սադրանք են։
ՌԴ ԱԴԾ–ի քննչական վարչությունը Պրիգոժինի դեմ քրեական գործ է հարուցել ՌԴ ՔՕ 279-րդ հոդվածով (զինված ապստամբություն կազմակերպելու փաստով)։