Բագրատաշենի մաքսային կետով հայր և որդի Ս. Գ.-ն և Ա.Գ.-ն իրենց մարդատար տրանսպորտային միջոցներով փորձել են անօրինական ճանապարհով դեղեր ներմուծել Հայաստան, սակայն բռնվել են։ Այս մասին տեղեկանում ենք ՊԵԿ լրատվական ծառայությունից։
Մաքսային կետում տեսուչի հարցին՝ արդյոք վերջիններս ունեն հայտարարագրման ենթակա ապրանքներ, քաղաքացիները ժխտական պատասխան են տվել: Հսկողություն իրականացնելու նպատակով մեքենաներն ուղարկվել են խորը զննման անգար։
«Արդյունքում, առաջին մեքենայի պահեստային ետևի նստատեղի և գազաբալոնի միջև գտնվող հատվածից և ետևի կողային դռների միջից՝ պաստառի տակ, հայտնաբերվել է մաքսային հսկողությունից թաքցված մաքսային հսկողության ներքո գտնվող ապրանքներ` տարբեր տեսակի և արտադրության դեղամիջոցներ, դեղորայքի դատարկ տուփեր՝ 41 կգ ընդհանուր քաշով»,–նշված է հաղորդագրությունում։
Իսկ մյուս մեքենայի կողային դռների միջից` պաստառի տակից, հայտնաբերվել են մաքսային հսկողությունից թաքցված, մաքսային հսկողության ենթակա ապրանքներ` տարբեր տեսակի և արտադրության դեղամիջոցներ և դեղորայքի դատարկ տուփեր՝ 40,5 կգ ընդհանուր քաշով։
Ապրանքները վերցվել և ի պահ են հանձնվել «Տրանս Ալյանս» ՍՊԸ–ի մաքսային տերմինալի պահեստ:
Փաստերի առթիվ կազմվել են մաքսային կանոնների խախտման վերաբերյալ արձանագրություններ: