ԴԺՀ-ում ձերբակալվել է Ուկրաինայի արտաքին հետախուզության ծառայության գործակալը։ Նա տեղեկություններ էր հավաքում ռուս ուժայինների և զորքերի տեղաշարժի մասին Ուկրաինայի հետախուզության համար։ Տեղեկությունը հայտնում է ՌԻԱ Նովոստին՝ հղում անելով Ռուսաստանի ԱԴԾ-ին:
ԱԴԾ-ի ԴԺՀ վարչությունը տրամադրել է լրտեսի ձերբակալման տեսագրությունները։ Միխայիլ Միխայլենկոն խոստովանել է, որ 2014-2016 թվականներին ծառայել է ԴԺՀ ժողովրդական միլիցիայում՝ փոխգնդապետի պաշտոնում: 2016 թվականի սկզբին ընտանիքի հասցեին սպառնալիքների պատճառով մեկնել է Ուկրաինայի տարածք։ 2017-ին Միխայլենկոն ձերբակալվել է տնտեսական հանցագործությունների համար: Կիևի քննչական մեկուսարանում նրան առաջին անգամ փորձել են հավաքագրել Ուկրաինայի անվտանգության ծառայության հակահետախուզության սպաները։ Ձերբակալվածի խոսքով՝ այդ ժամանակ նա հրաժարվել է։
2018 թվականին տղամարդուն տնային կալանքի են ենթարկել։ Իր գործում առաջընթաց ունենալու համար Միխայիլ Միխայլենկոն սկսել է համագործակցել Ուկրաինայի արտաքին հետախուզության ծառայության հետ: Իսկ հատուկ գործողության սկզբից նրան պատրաստել են ԴԺՀ տեղափոխելու համար։ Ըստ ձերբակալվածի՝ դա տեղի է ունեցել ապրիլի 30-ին։ Դրա համար Միխայլենկոն հինգ հազար դոլար է ստացել։ Կիևից նա եկել է Լեհաստան, այնտեղից` Բելառուս, այնուհետև՝ Մոսկվա, հետո՝ ավտոբուսով դեպի ԴԺՀ:
Ուկրաինական հատուկ ծառայությունների գործակալն ընդունել է իր մեղքը և ասել, որ զղջում է իր արարքի համար: Տեսանյութում նա նույնիսկ լաց է լինում։