ԵՐԵՎԱՆ, 5 հունիսի – Sputnik. ՀՀ վարչապետի որդու` Աշոտ Փաշինյանի ենթադրյալ առևանգման գործով մեղադրյալ, 44-օրյա պատերազմում զոհված Ժորա Մարտիրոսյանի մոր` Գայանե Հակոբյանի նկատմամբ տնային կալանքը կա՛մ պետք է հանվի, կա՛մ փոխարինվի ավելի թեթև ռեժիմով։ Երևան քաղաքի առաջին ատյանի ընդհանուր իրավասության քրեական դատարանի մոտ լրագրողների հետ զրույցում այս մասին ասաց Հակոբյանի փաստաբան Գեորգի Մելիքյանը։
Ավելի վաղ հայտնել էինք, որ վերաքննիչ քրեական դատարանը Գայանե Հակոբյանի խափանման միջոց փոխել է տնային կալանքով։
«Այդպիսով պաշտպանության կողմի վերաքննիչ բողոքը մասնակի է բավարարվել. խափանման միջոց տնային կալանքը մեզ չի բավարարում։ Մենք քրեադատավարական գործիքակազմով ունենք հնարավորություն առաջին ատյանի դատարանում հիմա ևս բարձրացնելու այդ հարցը` խափանման միջոցն ավելի թեթև միջոցով փոխարինելու կամ ընդհանրապես չկիրառելու վերաբերյալ»,– հայտնեց Մելիքյանը։
Ըստ նրա` դատարանն իրավունք չունի տնային կալանքը շարունակաբար կիրառելու։
«Այն, ինչ արել է վերաքննիչ դատարանը, վերաբերել է բացառապես միջդատական վարույթին։ Աշոտ Փաշինյանի հետ կապված դեպքը տեղի է ունեցել մայիսի 17–ին, մայիսի 26–ին նախաքննությունն ավարտվել է, ուղարկվել դատախազին։ Ստացվում է` տնային կալանքը վերաբերելի է մինչև մայիսի 26–ը»,– հայտարարեց փաստաբանը։
Այսօր Գայանե Հակոբյանի նկատմամբ հարուցված քրեական գործով նախնական դատական լսումներն են։ Նա տնից դատարան է բերվելու իրավապահների ուղեկցությամբ։
Հիշեցնենք` մայիսի 17-ին տեղեկություն տարածվեց, թե «Որդիների կանչ» ՀԿ–ի անդամները փորձել են առևանգել վարչապետի որդուն։ Վերջինս հաղորդում էր ներկայացրել ոստիկանություն, որից հետո ՀՀ քննչական կոմիտե քրեական գործ է հարուցել մարդուն առևանգելու հոդվածով, կալանավորվել է մեկ անձ` Գայանե Հակոբյանը։